Den reunion general di SPA dialuna, a bin dilanti:
- Pero ainda nada a wordo resolvi
ORANJESTAD (AAN)- Dialuna 29 di Juni aki, Sindicato di Polis Aruba (SPA), tabata tin un reunion general na sede di SEPPA, pa atende cu e cantidad di problemanan, cu tin den Cuerpo Policial di Aruba. Den un entrevista cu DIARIO, Presidente di SPA, señor Lito Laclé, a elabora tocante e reunion aki.
E meta di e reunion aki, Laclé a bisa, ta pa actualiza e informacion di tur loke SPA ta bezig cu ne. Nan ta update via chat, pero no solamente esey, sino tambe via e mail, y awo cu un reunion general, den cual e miembronan tin e poder pa bin cu cierto mocionnan pa duna SPA mandato pa cierto cosnan.
Dia 1 di Juni, SPA a manda cuater carta pa Mando Policial. Un di nan ta e bulletproof vest, e di dos ta e samenwerkings protocol cu Respaldo, e di tres ta restructuracion y di cuater ta Strand Politie.
“Y nos a haci un afspraak cu ne y a dun’e dos siman pa contesta e cartanan aki. Y enberdad dia 13 di Juni nos a haya contesta riba e cartanan aki. Tocante e bulletproof vest, nos a haya sa door di e carta aki cu desde 9 di Februari di 2026 caba, Mando Policial a haya sa cu mester inicia e proceso di bidding pa cu esaki. Nan a priminti nos cu na Juni nan ta cuminza, awe ta 29 di Juni, nos a designa dos colega di SPA pa forma parti di e comision pa e procedure y ainda nos no a haya ni un invitacion pa cu esey”, Lito Laclé a duna di conoce.
Pa loke ta trata e samenwerkings protocol cu Respaldo, Laclé a indica: “Nos reunion cu Mando Policial tabata dia 16 di Juni, y dia 17, pa prome biaha el a haya e concepto di Samenwerkings Protocol den su man, y conhuntamente cu dos miembro di e bestuur, tambe nos tin cu repasa esaki”, Lito Laclé a indica.
El a agrega cu un di e problemanan mas grandi cu nan tin aworaki ta salud mental, unda mester zorg pa e siguridad di e polisnan riba caya, y pesey mester di un protocol claro riba kico pa haci ora duna un asistencia asina ey.
