ORANJESTAD (AAN): E trabao cu oficialnan hudicial trahando pa seccion San Nicolas ta haciendo, ta produciendo fruta.
Vocero policial a confirma cu algun dia pasa, team di Recherche a tene un razzia na un cas na Esso Heights cu tin di haber cu varios caso di ladronicia.
Loke Recherche di Team Woninginbraken a traha riba dje, ta purba resolve diferente caso di kiebro, principalmente unda e modus operandi di e delincuentenan ta, pa drenta via dak.
Esaki hunto cu otro casonan mas cu ainda ta worde investiga, Recherche di San Nicolas (DAR3) riba Diahuebs mainta a haci un entrada hudicial na un cas na Essoheights y akinan a detene e hende homber di inicial S.Q.K. di 22 aña, naci na Aruba.
Durante e buskeda na e cas den e entrada hudifical, a bin topa y confisca un arma di candela.
A cuminza interoga e persona aki di Essoheights, y a base di su declaracion, riba Dialuna mainta, relaciona cu e mesun caso a haci un entrada hudicial na un cas na Bushiri y a detene e homber O.J.V.T.P. di 23 aña naci na Aruba.
Den e cas na Bushiri tambe durante e razzia, a bin haya y confisca un arma di candela y a confisca esaki.
No ta descarta cu lo ta bay tin mas detencion.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama e tipline di Polis cu ta 111-41. Nan ta garantisa cu bo ta keda anonimo.
