ORANJESTAD (AAN): Riba Diahuebs atardi pa 2:10 pm, Central di Polis a manda unidad di Noord rumbo pa un adres na Monserat pa check caso di kiebro den cas.
Ora cu Polis a yega, nan a papia cu e persona cu a yama autoridad, esta e ciudadano di inicial K. Segun K. a splica, e mainta ey banda di 8:30 am el a bandona su cas y laga esaki na lock y intacto atras. Algun rato despues, pa 9:45 am el a regresa cas bek. E momento ey el a bin ripara cu e porta dilanti di su cas ta completamente habri.
Na momento cu K. a drenta e cas, el a ripara mesora cu e bicicleta color cora di su cliente, no tey mas den sala. Ta trata aki di un bicicleta pa muher, color cora, cu un canasta mara na e cacho di stuurwiel. Riba e frame di bicicleta tin un sticker color berde. E wiel patras tin un wantalodo color cora, y e bicicleta tin patras un pida hero pa mara tas riba dje.
Segun K. a sigui splica, cu el a ripara tambe cu un powertool, esta un Circle-Saw color berde di marca Black & Decker a wordo horta tambe.
Despues di mas control, a bin ripara cu e bentana di sala cu ta na banda pabao di e cas, ta habri. E sa cu el a bay lagando esaki cera. El a bin nota cu e sefta contra sangura pafo a wordo kibra, pues ladron a drenta via e bentana.
Mirando e situacion, e ciudadano K. a yama un famia di dje. El a splica den ki situacion el a bin haya e cas. E familiar a splike, cu e ta kere cu nan tin di bay papia cu e homber conoci como P. Pasobra el a mira aworey e homber P. aki canando den e mondi patras di e cas.
Despues cu Polis a tuma e denuncia, e agentenan a subi caya enbusca di P. den area di Palm Beach, pero sin resultado. A base di esaki, Polis a dicidi na bay na e cas mes di P. na Washington pa check si e lo ta eynan.
Ora di yega na e adres, a puntra e habitante si acaso P. ta na cas. E habitante a splica agentenan, cu banda di 11:00 am el a mira P. yega cas cu un bicicleta cora. El a bisa cu despues el a mira P. sali bek cu e bicicleta aki direccion panort.
Mirando e hecho cu e homber P. lo ta coriendo rond cu e bicicleta horta, e unidad a dicidi na suministra e informacion aki via Tetra-Radio na tur otro patruya riba caya tira un bista.
A base di esaki, Polisnan a bolbe bay den area di Palm Beach y Semeleerstraat, pero atrobe no a topa cu P. Mirando cu P. no por wordo haya ningun caminda, Polisnan a dicidi na bay bek na e cas di P. na Washington.
Aki a bolbe papia cu e habitante, y el a declara cu un rato pasa P. a caba di yega cas. Poco rato despues, e agentenan a mira con P. ta sali di e cas y cana bay na Polisnan. Polis a puntra e homber, unda e bicicleta ta. Aki e homber P. tabatin cara di desmenti cu e tin bicicleta. Poco despues, el a cana bay banda pabao di su cas, y a bin bek cu un bicicleta cora. El a entrega Polis e bicicleta cora. Autoridad a ripara cu e bicicleta cora tin tur descripcion cu a wordo duna. Pero e canasta parti dilanti no tey mas.
A base di esaki, Polis a detene e homber P. pasobra a viola Articulo 2:397 di Codigo Penal di Aruba. El a wordo transporta pa Warda di Polis.
