Dama hoben a sali di paranda pero a intoxica y bira basta malo den Hot Zone

ORANJESTAD (AAN): Den un momento di panico total, varios yamada a drenta na autoridad riba Diabierna anochi laat pa manda unidad di Ambulans cu urgencia pa un Nightclub cu tin na e piso mas halto di un mall nobo net na birada di Irausquin Boulevard na Palm Beach.

   Debi na e tantisimo yamada, varios unidad di Polis di Noord como tambe di Strandpolitie, fuera dos unidad di Ambulans a mobilisa e ora pa Hot Zone.

   E prome unidad di Polis cu a yega, a core bay halto na e Club Nocturno y a bin topa cu un dama hoben cu a bira basta malo, claramente mustrando di a intoxica su mes.  Esnan eybanda a splica Polis cu e dama tin 17 aña di edad so, y cu el a bebe alcohol y kizas tambe ecstasy (XTC), cu nan a yama eynan ‘molly’.

   Tur esaki a pone cu e dama hoben a cuminsa bira malo, tin biaha a cuminsa ‘gasp’ pa aire como cu e no tabata por a hala rosea bon.  Pesey e amigonan a bay den panico y core yama pidi yudansa.

   Ambulans tambe a yega mesora despues, y paramediconan a core check e señalnan vital di e dama hoben, y mirando e storianan cu amigonan a conta, e probabilidad ta halto cu intoxicacion di sea alcohol of otro substancia a pone bay den e situacion ey.  A dicidi cu mihor ta pa bay cune Hospital mesora pa aki e.o. spula su stoma rapidamente, y sigui observe.

   E momento ey e cantidad di Polis presente dilanti e Mall aki tabata inmenso.  Nan a percura pa Ambulans a yega rapido Hospital cu e dama victima.