ORANJESTAD (AAN): Diamars anochi pa 10:10 pm, un unidad di Polis di Noord a ser manda na un adres na Palm Beach pa check un caso di destruccion.
Ora cu Polis a yega na e adres, agentenan a papia cu e señora di inicial K. Segun e persona aki a splica Polis, cu un dia prome, esta Dialuna anochi trempan pa 6:00 pm el a bay na un Gasoline Station y a yena e tanki di su auto. Ora cu el a habri e tapadera di e tanki, el a mira cu tur cos ta normal. El a yena e tanki cu gasolin, cera e tapa y despues a mobiliza pa un cas na Brikstraat, cu ta keda den Madiki.
Diamars anochi pa 10:00 pm e tabata atrobe na Gasoline Station pa yena mas gasolin. Ora cu el a bay pa kita e capa di e tanki, el a mira cu e tapadera ta un tiki mal cera, y el a ripara cu algo no ta bon.
Ora di kita e tapadera di e tanki, el a bin ripara cu tin sucu benta den e nek di e tanki di gasolin.
Pesey ora el a yega cas, el a yama Polis pa haci e denuncia aki. Polis a tuma e denuncia, y a registra e caso aki.
Sucu den tanki di gasolin, mescos cu cualkier sedimento por bay plok e fuel injector of e fuel filter, si acaso tin demasiado sucu basha aden.
Hopi hende ta kere eroneamente cu sucu mezcla cu gasolin lo bay converti e liquido den un sorto di lodo cu ta bay daña tur cos den tanki y den motor. Djis corda cu sucu NO ta disolve den un tanki di gasolin mescos cu e ta haci ora bo bashe den awa of coffie. E cristalnan di sucu ta djis sink bay na e bom di e tanki, mescos cu si acaso santo bay den tanki. Masha poco biaha e por causa daño grandi na e motor.
Den e caso aki, loke sigur e doño di auto ta obliga di haci, ta cu bo lo tin di bay cambia e fuel filter, y kizas hasta haci full e tanki bashi pa saca e sucu di e bom. Tur esey lo por ta algo costoso pa haci awendia.
