Ta desaproba partidonan cu ta pidi simpatizantenan acudi na Censo
ORANJESTAD (AAN): Diabierna awor ta e dia pa entrega Lista Oficial di cada partido politico pa eleccion 2021.
Ya caba Conseho Electoral a manda e mensahe cla y raspa, cu solamente 2 persona maximo pa Partido por bin entrega lista, cu lo ta riba e stacionamento di Censo.
Pero ya caba a informa, cu DOW y tambe Polis lo tin full e caminda ey rond cera. Pues Polis no tin e humor pa tuma nota cu algun partido politico ta invitando nan campañadornan pa bay sostene e acto di entrega di lista pa Diabierna awor.
Halto Comisario Vanessa Kock, a remarca Diaranson atardi durante un conferencia di prensa, cu Cuerpo Policial a reuni cu e partidonan pa asina papia cu nan cla y raspa riba e forma cu ta hiba campaña e biaha aki den cuadro di e pandemia.
Aki a mustra cu tin di cumpli cu tur protocol y regla sanitario, pues evita aglomeracion y principalmente cumpli cu e decretonan di emergencia cu ta valido pa e isla aworaki.
Pa e entrega di lista, Comisario Kock ta haya un falta di respet e plamamento di foyeto unda ta pidi simpatizantenan pa acudi na Censo como sosten. Pasobra Decreto Ministerial ta di pais Aruba. Si esaki ta e comportacion cu tin di spera pa Diabierna awor, e ora Cuerpo Policial tambe tin di prepara su mes pa e tipo di di actuacion aki.
Kock ta nada contento cu Polis mester a actua na 28 ocasion recien pa asina atende ‘actividad politico’ cu tabata bayendo for di man unda hende no ta preocupa cu nan deber civico pa mitiga e brote di Coronavirus.
KPA tin diferente acuerdonan traha cu e Partidonan Politico. No lubida cu tur politico ta bayendo eleccion y den futuro nan tambe lo tin di dirigi e pais. Pues e concientizacion no ta djis pa esnan cu ta violando e ley, pero practicamente pa e partidonan ta conciente kico nan mesun miembro ta haciendo!
“No mester ta asina cu constantemente nos tin cu pidi pa bo sano huicio pasobra ta yega un momento, pa loke ta Diabierna awor, bo mester cuminza ripara y ta conciente tambe kico ta pasando na Aruba,” Kock a bisa. El a splica cu aki mester tene cuenta no djis cu partidonan politico, sino cu e simpatizantenan tambe.
E actuacion di Cuerpo Policial durante e lunanan di eleccion aki lo bay ta hungando un rol hopi importante, y lo bay tin pronto reunion cu Ministerio Publico tambe pa dicidi kico lo haci.
Kock a enfatiza cu e reglanan di emergencia valido pa Aruba ta conta pa tur hende, incluyendo politiconan.
“Lagami ta claro den esaki, Cuerpo Policial no mester bira e bala di tennis di ningun partido politico. Cuerpo Policial tin un tarea, y e tarea ey ta mantene orden publico. Pero bo ta haya bo cu naturalmente den un periodo dificil aki, Polis sea ta target of ta pest, y esaki no ta intencion pa ningun miembro di Cuerpo Policial,” Kock a indica.
