Cuatro Polis a wordo promovi pa Inspecteur di Polis

Esaki ta liderato nobo

ORANJESTAD (AAN): Recientemente a tuma lugar na Warda di Polis Santa Cruz entregamento di decreto gubernamental pero tambe promocion y cambio di rango pa cuater Polis den funcion di liderato.

   E agentenan aki ta fungi como liderato den e organisacion y nan experticio y conocimentonan sigur por hisa e calidad di e servicio Policial.

   Ta traha aki di Polisnan M. Dirks, W. Werleman, I. Matos, y E. Barry kendenan tabata Onder Inspecteur y awor a bira Inspecteur. Tur cuater tin amplio experiencia y hopi aña di servicio cu conoce e organisacion di KPA di paden y pafo.

   Cu introduccion di nan como liderato nobo pa algun departamento importante nifica un guia y cambio nobo pero tambe duna oportunidad pa oficialnan por sigui desaroya nan mes den carera policial.

   Den presencia di altocomisario di Polis drs. Ramon Arnhem como tambe Mando Policial y coleganan a haci e cambio di rango y a hiba palabranan di sosten y hopi exito den nan funcion nobo. Cuerpo Policial Aruba ta cla pa ricibi nan cu man habri pa asina traha hunto na bienestar di Pais Aruba. Alabes contento di mira hende muhe den funcion halto pa sigui guia Cuerpo Policial.