Control a cuminza contra bendemento di ‘vape’ na hoben bao di 21 aña

Un problema serio bao di nos hobennan

ORANJESTAD (AAN): Recientemente bao iniciativa di Polis di Bario Santa Cruz conhuntamente Polis di departamento di Permiso (SBV) y Polis Uniforma a cuminsa cu un proyecto pa cu control y concientisacion pa cu benta di “vape”.

   Mirando e situacion y problema pa cu salud bao di nos hobennan, a dicidi na cuminza e proyecto aki.

   A ser splica na DIARIO, cu e meta principal ta pa conscientisa e comerciantenan pa loke ta trata e benta di e producto Vape. Pa ley ta prohibi pa bende un hoben bao di 21 aña Vape. Tambe prohibi pa un hoben bao di 21 aña huma Vape

   Como parti di prevencion tanto pa salud y concientisacion pa hobennan di e problema aki, departamento di Salud Publico (DVG) como tambe Fundacion Anti Droga Aruba (FADA) tambe a worde invita pa forma parti di e accion di control aki. 

   Durante fin di siman a haci un control di e tema aki na algun comerciante den districto di Santa Cruz . Polis conhuntamente cu DVG y FADA a bay diferente establecimento y controla, informa y conscientisa e comerciante kico ta e consecuencia pa bende hoben bao di 21 aña Vape.

  Cada departamento a tuma e oportunidad pa splica y avisa e comerciante loke ta e parti di boet como tambe a enfatisa e pakico no ta permiti bende na menor como tambe hoben bao di 21 aña di edad y cu hobennan aki tampoco no por usa Vape. E ley aki ta existi caba bao di e Ley di Tabaco (Landsverordening Beperking Tabaksproducten).

  A tuma nota cu Vape ta un trend nobo bao di e hobennan. Durante charlanan duna na diferente scolnan por a ripara cu e tematica aki ta keda bin dilanti y na unda ta bin haya hobennan cu e Vape den nan poder. 

   KPA, DVG y FADA ta haci nan esfuerso riba e area di prevencion pa concientisa e hobennan durante charlanan na scol kico ta e consecuencia cu Vape tin pa nan salud. Nos ta pidi mayornan pa ta atento cu boso yiunan riba e tema aki y e peliger cu Vape por causa riba nan salud tanto pa corto pero a largo plazo.

   Esaki ta djis e comienso KPA cu lo bay sigui cu e controlnan aki tambe na diferente localidadnan y areanan. Corda VAPE ta prohibi pa hobennan bao di 21 aña.