ORANJESTAD (AAN): Ta nos mes a crea oportunidad pa atracadornan haya tur cos facil pa nan comete nan fechoria?
Esaki ta tantisimo pregunta ta keda colga rond den comunidad. Lamentablemente e ultimo añanan por mira un aumento den cantidad di actonan castigable ta wordo cometi, manera atraco, hortamento, cantidad di arma di candela cu ta circula riba e pida baranca aki.
Y lo peor ta, cu algun crimen ‘nobo’ cu a cuminza trend na Aruba ta cosnan cu no conoce den pasado, esta cu hobennan di edadnan di 17 aña bay ariba ta envolvi den ‘Drive-by Shooting’. Nan ta kere cu ta videogame di Grand Theft Auto nan ta hungando, y cu na final nan ta djis primi e boton di ‘reset’ y tur hende ta bek na bida.
Sin lubida e asesinato di un hoben estilo “ehecucion” sinta den su auto na Pos Chikito. Cosnan asina bo no tabata haya antes na Aruba.
Pesey mes awe ta nos tur ta man na cabez debi cu e cantidad di pistolero a aumenta drasticamente. Ta parce comosifuera cu arma ta facil pa haya awendia pa nan cumpra. Sin lubida e fenomeno di peer-pressure cu por empuha hobennan cu ta “bon mucha”, pa bira miembro di nan gang pa comete fechoria tur dia of anochi. Famianan despues ta keda sorprendi ora nan mira noticia cu nan yiu ta deteni como sospechoso di a comete atraco violento.
Autoridad competente tin e deber tambe pa organiza un campaña di “pordon”, unda ta haci suplica na comunidad pa esnan cu ta den poder di arma di candela, pa entrega esaki riba corto plazo, sin cu bo ta wordo castiga pa esey. Den pasado el a wordo haci, y den un frega di wowo ta hopi arma a ser entrega.
Ban corda den pasado tempo di nos hubentud, unda abo tambe a hunga wega di ‘Politie en Dief’. Awe nos ta homber y muher grandi y a base di desgracia cu arma di candela tur esaki ta pasando apesar e tempo ey tabata co’i hunga. Ban salba nos hubentud, pa concientiza nan cu arma di candela ta peligroso y bo no por djis primi un boton di ‘reset’ pa tur cos bay bek normal. Unavez bo a los a tiro... bo a no a perde djis un proyectil, sino tambe parti di bo bida ta bayendo perdi. Chens grandi cu bo lo ta pronto den un graf, of pronto den prison tras di trali.
