Alto Comisario Vanessa Tjon-Kock - *94 di nan tabata cu herido grave
ORANJESTAD (AAN): Alto Comisario Vanessa Tjon-Kock a indica cu den ultimo fin di simannan tabatin den diferente parti na Aruba, varios control di polis. Segun e Alto Comisario, e intencion di e controlnan aki tabata practicamente pa otro meta, manera violencia y busca armanan di candela, pero awo nan ta wordo confronta un biaha mas cu Covid. Esaki no ta nifica cu trabao di polis ta bay cambia, simplemente ta bay aumenta.
Señora Tjon-Kock a bisa cu e controlnan di weekend ta bay sigui. Pa diasabra polis lo ta riba caminda den diferente area y tambe lo realiza listramento preventivo di 7'or di anochi pa 7'or di diadomingo mainta. El a agrega cu manera den ultimo weekendnan, lo tin hopi unidad riba caya cu lo haci diferente control den lugarnan nocturno.
A base di e medidanan cu a wordo tuma, un biaha mas, polis lo keda encarga di haci e controlnan. Señora Tjon-Kock a expresa cu decision riba orario di ciere no ta bin sin motibo, esaki ta pa limita e problemanan cu ta pasando actualmente relaciona cu Covid. E ta haci un peticion na doñonan di establecimentonan, cu ta nan mes a bati alarma y a ripara cu e situacion ta saliendo completamente for di man, pa tuma precaucionnan den nan mesun lugarnan. Polis por controla, Task Force Bedrijven por controla, y e ta compronde cu no ta nada facil si ta cierto negoshi ta wordo controla, pero mester ta conciente cu mester tuma precaucion pa yuda polis cu e trabao.
E Alto Comisario a bisa cu e tambe ta conciente cu Cuerpo Policial ta bay confronta cu discusionnan relaciona cu Gebiedsverbod. Ta prohibi pa ta den areanan publico, manera parkinglot y beachnan entre ora di 12:00 pa 6'or am. E ta adverti cu e tipo di controlnan aki ta bay ta severo y esaki ta pa yuda pa cantidad di contagio no bida mas halto.
El a duna como ehempel situacion di trafico, manera por a wak den medionan social den ultimo dianan aki, tin basta problema pa loke ta trata trafico cu accident. Di 9 di juli, cu practicamente ta temporada di vakantie, te cu 5 di augustus, Cuerpo Policial a registra 581 dalmento di cual 94 di nan tabata cu herido y varios tabata loke nan ta yama 'zware aanrijding', casonan cu na final ta yega hospital. El a enfatiza cu tabatin 3 caso di morto y un turista cu te dia di awe ta lam. No ta tur caso tabata relaciona cu consumo di bebidanan alcoholico, pero na momento cu a dicidi di impone prohibicion di alcohol, ta pasobra tin suficiente informacion, caso y melding cu polisnan ta enfrenta diariamente y sigur den fin di siman.
Comunidad a haya libertad y oportunidad pa flexibiliza y siguramente tur hende ta anhela pa esaki, pero Alto Comisario a avisa cu mas medida lo bin si tur hende no keda conciente riba nan comportacion. Control di Polis ta pa bienestar di comunidad, nan ta haci nan trabao y comunidad mester duna nan oportunidad pa haci nan trabao. Pero ta keda na cada un tene cuenta cu e situacion actual, specialmente den caso di aumento di contagio.
