Ciudadano Raimundo Koolman a bira e di 8 morto di trafico pa 2025

Accident fatal riba Green Corridor

• Victima a perde su bida riba caminda mes 

ORANJESTAD (AAN): Tabata Diabierna mainta alrededor di 9:15 am, cu yamadanan a cuminza drenta na Central di Polis, cu riba caminda di principal di rotonde Pos Chiquito bay abao un auto a dal un peaton.

   Inmediatamente a cuminza manda patruyanan di San Nicolas pa e lugar.  Polisnan motoriza den e area tambe a mobiliza pa e lugar.

   E prome unidad di Polis cu a yega, a nota cu e accident ta riba Green Corridor como 250 meter pabao di rotonde di Pos Chiquito, y cu no ta trata di un auto, sino un vehiculo tipo SUV Kia Sportage color blanco cu number A-4008 a dal un peaton cu tabata cruzando e caya, y sea e no a mira bon of no a calcula con rapido trafico ta yegando.

   Polis a core yega na e victima abao, y a mira cu ta trata di un persona masculino, adulto mayor, y cu e tin basta sla na su curpa.  Pero e no tabata reacciona, y pesey a pidi pa Ambulance yega cu maximo urgencia.

   Mientras tanto Specialista di Trafico tambe a yega pa asina cuminza cu investigacion.  E unidad di Ambulance cu a yega, a stop y paramediconan a core baha bay check.  Pero a bin nota cu e victima no tin ningun señal vital mas, pues nan como profesional no por haci nada mas.  Nan a notifica Polis cu den e caso aki tin di busca un Docter.

   Trafico e momento ey a wordo desvia banda di rotonde di Pos Chiquito mes.  Team forensico di BFTO tambe a yega pa asina yuda Polis di Trafico.

   Pa 10:30 am, Docter forensico, Dr. Scholten a constata morto di e victima identifica como Raimundo Alfonso Koolman, naci na Aruba dia 23 di Januari 1959, pues e tin 66 aña di edad.  E ta conoci como ‘Bieu’.

   Riba e vehiculo por a nota cu mayoria di e golpi ta parti dilanti cerca di wantalodo drechi.  A manda busca Bureau Slachtofferhulp pa atende famia.

   Famia a splica cu Raimundo ta un persona kende ta cana hopi, aunke ta un banda di wowo so e tin.  Esey por splica parcialmente di con e accident por a socede, debi cu un persona cu un solo wowo no por ‘calcula’ velocidad cu un auto of vehiculo ta acercando.

   Nan ta pensando cu Raimundo ta cruzando caya pa bay su cas, cu ta situa den area di ex-Rey Hing Minimarket riba caminda bieu di Pos Chiquito, y cu awor ta yama Kam Man Food Mart.  Pues como 130 meter leu di unda e accident a socede.

   Vocero di Polis, Liliana Rasmijn a confirma cu Raimundo Koolman a bira e di 8 morto den trafico pa 2025.  Awor Specialista di Trafico ta investigando e accident, y e ta e unico cu lo produci e rapport cu detaye exacto di causa di e desgracia tragico.

   DIARIO como tambe Cuerpo Policial ta manda palabra di condolencia na famia di e fayecido.