ORANJESTAD (AAN): Diasabra atardi laat, alarma a wordo bati cu lama bruto a pone un piscado di baranca finalisa den lama, y diripiente a perde for di bista.
Un amigo di dje cu tambe tabata piscando cune na altura di Punta Basora, a nota cu e persona cada rato ta posiciona su mes na otro area pa sigui pisca y mira si eynan por gara pisca mihor. Asina el a keda cambia di lugar, y dado momento e no a mire mas.
Aki a cuminsa pensa cu kizas e persona aki lo a slip y cay for di baranca, of ola a dal’e y bente abao. Asina a dicidi na bati alarma cu e persona ta perdi.
Polisnan mesora a cuminsa mobilisa pa e area, y e Helicopter di Polis tambe a bay halto pa yuda den e buskeda. Esnan den Helicopter a bin mira cu tin un curpa ta drief den lama mas pabao na altura di Santana di Cacho, y asina a notifica esnan na tera.
Polisnan di San Nicolas, y tambe persona di Cuerpo di Bombero cu a mobilisa pa e area di Colony, a bay check e situacion na Santana di Cacho. Enberdad a bin mira cu e lama keto bay tin e curpa ta drief riba lama, y e ora personal di emergencia a traha un plan, pa asina na un forma safe por drenta awa cu tur precaucion, pa asina gara e curpa, y bin bek tera cune.
E persona ya no tabatin señal vital mas, y pesey via Centro di Alarma a pidi pa presencia di Docter.
Poco rato, Docter a constata morto di Christian Moncion Martinez di 46 aña di edad, naci na Republica Dominicana.
Recherche di Oranjestad, como tambe team forensico di BFTO tambe a wordo poni na altura pa haci nan investigacion, pa determina kico exactamente a socede.
E fayecimento di Christian a cay duro pa tur su amigonan. E tabata wordo considera como un persona di bon curazon, semper dispuesto pa yuda tur persona of colega, y ta wordo mira semper como un persona trahador y cu hopi habilidad.
Na famianan di e fayecido, DIARIO ta extende su mas profundo palabra di condolencia.
