ORANJESTAD (AAN): Tabata Dialuna atardi pa 4:05 pm, cu un unidad di Polis di Santa Cruz a wordo manda na Sanctuario di Burico na Bringamosa, pa check un caso di ladronicia.
Polis a yega y papia cu un persona encarga na e Sanctuario, y el a splica Polis cu ni 7 minuut prome cu esey, el a mira un auto color beige staciona otro banda di caminda di e Sanctuario, y un homber desconoci a baha di e vehiculo, a core gara un pauwis, y hiba e animal pa sconde den e vehiculo, y despues a core bay di eynan.
Esaki ta e pauwis cu hopi hende a admira inmensamente recien durante un actividad na Sanctuario di Burico.
Si acaso abo sa kende diripiente tin un Pauwis na cas, of si acaso bo a wordo ofreci un Pauwis pa cumpra desde Dialuna caba, por fabor yama Tipline di Polis na 111-41. Ban yuda e Pauwis aki yega bek na su cas.
