Chauffeur burachi y pa colmo agresivo a causa accident riba rotonde

Diadomingo anochi

ORANJESTAD (AAN): Diadomingo anochi den careda di 7:00 pm, un situacion fastioso a socede na e rotonde di Caya Betico Croes y Verlenging De La Sallestraat cu Verbindingsweg na Playa.  E momento ey un accident a keda registra net na e rotonde basta druk, mirando cu tabatin hendenan cu a caba di mira Carnaval bayendo cas.

   Diripiente un auto sedan Suzuki SX4 color blanco cu number A-11612 a bin di pariba cu velocidad halto, y na un forma violento a bay dal tras di un Nissan Sentra NISMO color blanco cu number A-42818.  E impacto a laga full e parti patras di e Nissan destrui.

   Como sifuera poco, e chauffeur di e Suzuki SX4 tabata basta burachi of bao influencia di un of otro substancia.  El a baha, y a cuminza busca forma pa start un pelea cu esnan den e Nissan.

   Pa casualidad un unidad di Recherche Oranjestad a pasa, y mesora nan a stop y actua pa stop e intento agresivo aki.  E homber a manera purba resisti, pero e oficialnan hudicial na forma tactico a sa di pone boei na su man, y a pone e homber abao na suela pa por keda cu control riba dje.

   E oficialnan di Recherche a solicita pa transportwagen di CEA, cu a yega pa asina bay cune.  El a wordo hiba warda di polis, unda cu ora e bin bij lo realisa e gasto cu e la hinca su mes aden door di core auto burachi.