Chauffeur burachi a ocasiona accident den birada di Santa Cruz

ORANJSTAD (AAN): Polis a ser informa Diadomingo anochi alrededor di 8:00 pm, cu un accident fuerte

a socede riba e birada conoci como ‘cuchara di Santa Cruz’ riba e caminda di Kibaima pa Pos Abao.

   Polis di Santa Cruz mesora a dirigi na e birada aki cu ta poco panort di Panaderia Huchada, y na yegada a bin topa cu un boksmento, unda tin un persona pega den auto.  Mesora a pidi presencia di Vehiculo di Rescate di Cuerpo di Bombero, pa yuda e victima debi cu e porta via cual e tin di sali tabata pega.

   Ambulans tambe a yega, y despues cu yudansa di Bomberonan, a saca un hoben for di e Nissan.  E persona a ricibi golpi y tin mester di atencion medico.

   Dos ambulance a presenta, pero uno so tabata necesario debi cu e otro chauffeur tabata bao influencia y a wordo deteni y transporta pa Warda despues cu polis di trafico a tuma su declaracion.

   Segun e chauffeur bou influencia, e lo tabata den su liña y e otro auto a bin dal contra dje.  Pero e rapport final di Polis lo tin tur cos den claridad.