CEA ta encarga pa kita y pone banchi na enkel na detenidonan cu bin na remarca pa haya un

Funcionario Richard Krammers:

ORANJESTAD (AAN): Director di CEA, señor Richard Krammers a duna splicacion tocante e sistema di monitoreo electronico, Justice “Buddi” specificamente riba e banchi di pia. El a remarca cu un grupo selecta a haya training con pa pone y kita e enkel band na un detenido. E banchi di enkel ta pa evita cu e detenido bay cera na KIA.

   El a splica du den caso cu un persona no cumpli cu e condicionnan, CEA ta haya notificacion for di Reclassering cu e persona aki lo a sali for di e area y ta bay den areanan cu e no ta permiti pa bay. Den e caso aki, personal di CEA ta tuma contacto cu e detenido, sea personal of via telefon, y ta hala su atencion y indic’e cu el a sali for di su area. Si e situacion escala, lo inclui cuerpo policial.

   “Pa awo, CEA ta haya notificacion for di Reclassering, cu na su banda ta haya notificacion di e compania na Inglatera. Poco poco nos ta haya mas autorisacion pa monitoria despues cu e proyecto piloto caba”, el a expresa.

   Señor Krammers a duna di conoce cu e persona cu haya un banchi di enkel, Reclassering y Hues Comisario ya a combersa cu ne y a splic’e e condicionnan di esaki y cu e banchi di enkel ta na luga di bay prison. Segun e, e persona lo coopera conscientemente cu e banchi y no ta wordo forsa pa uz’e. Por lo tanto, segun señor Krammers, e chens ta chikito cu e no lo atene su mes na e condicionnan. Den caso cu e no cumpli, e persona lo mester bay KIA.

   “Esaki ta un proyecto cu ta den tramite pa hopi aña caba. Reclassering ta e motor tras di esaki y CEA ta duna su aporte. Nos ta sinti cu e ta algo hopi bon pa nos hobennan especialmente cu alavez ta haya oportunidad di ricibi guia pa nan no cay bek den man di husticia”, señor Krammers a expresa.