Caso fatal ora hoben a cay cu su auto for di baranca di Malmok den lama

Pa suerte un testigo a mira loke a socede

• Jonathan Wernet Jr. di 21 aña a perde su bida 

ORANJESTAD (AAN): Un persona kende Diasabra mainta trempan, ora cu solo ainda no a sali tabata coriendo den area di e T-weg cu ta conecta Irausquin Boulevard cu Malmokweg y tambe caminda pa bay Faro di California, diripiente a mira con un auto compacto a baha di caminda, y subi e pida barancanan di Malmok y sin primi brake a djis bay over y cay den lama.

   Tabata exactamente 5:31 am, cu Central di Polis a wordo notifica via Centro di Alarma, cu un yamada a drenta via 911 pa raporta cu un auto a caba di cay den lama na altura di Malmok.

   Centro di Alarma mes a caba di manda Ambulance y Brandweer, y awor Central di Polis a dirigi varios unidad pa e lugar.

   E prome unidad cu a yega, a nota cu esaki ta como 115 meter pabao di e T-weg aki di final di Malmokweg cu Irausquin Boulevard.  E ta como 175 meter zuid di beach di Tres Trapi.

   E prome patruya a bin topa cu e testigo, kende mesora a notifica e agentenan cu e auto a move bay y sin primi brake a pasa over di baranca y cay den lama.  E mes a core yega cerca, pero a mira cu ningun hende a sali for di bao superficie di lama.

   Accion di Polis: Segun vocero Liliana Rasmijn di Cuerpo Policial, e agentenan policial no a duda y mesora bay den accion y riesga nan bida den scuridad pa bula den lama, y asina controla si tin un persona den e auto. E agentenan a wak cu tin un auto cu su cuatro wielnan ariba den lama y un persona masculino ainda aden y no ta reaccionando.

   Central di Polis na su turno a pidi asistencia di Wardacosta di Caribe Hulandes, y nan a core manda un boto di reaccion rapido Metal Shark rumbo pa Malmok.  Ora cu e personal di Wardacosta a yega, nan a haci algun palabracion, y di e forma ey hunto cu Polis a sambuya y a logra saca e curpa di e homber cu apariencia basta hoben for di e auto compacto, y bin halto cu ne.

   Un persona eybanda a yuda cu un surfplank pa asina nan a hisa e curpa riba esaki, y asina landa y pusha pa e boto di Wardacosta, cu a bay cu e persona cu no ta duna señal di bida, y mobilisa pa Pier di Hadicurari.  Ambulance tambe a bay eynan.

   Pero ora cu a yega cu ne na Hadicurari, a bin detecta cu e curpa ya no tin señal vital mas, y a notifica pa manda busca un Docter.  Na e Pier e ora, Docter Forensico di Polis, esta Dr. Scholten a yega, y pa 7:10 am a constata morto di e hoben Jonathan Jeremy Wernet Junior, naci na Aruba dia 3 Februari 2004, pues tin 21 a؜ña di edad.  Recherche tambe a yega eynan hunto cu team forensico di BFTO pa investiga y documenta tur cos.

   Saca e auto: Mientras tanto a cuminza planea con pa bay saca e auto di eybao, cu a resulta un Nissan March color blanco cu number A-19321.  E coriente di lama despues a manera pusha e auto un tiki mas leu for di baranca.  Keto bay e tabata cu su cuatro wielnan den halto.

   A busca servicio di e compania 2Fast4U Towing cu a bin cu un takelwagen heavy-duty.  Cu yudansa di dos persona cu ta duik, y cu guia di Polis Maritimo cu a yega eynan cu nan boto BP-2, a rek e waya di takelwagen, y a pone algun cadena na e chassis di e auto.  Asina a keda rek pa lastra e auto na suela, te cu el a sali for di awa, un poco prome cu merdia, pues despues di varios ora cu e caso a socede.

   Aki a keda cu ne wanta den halto te ora cu mayoria druppel di awa a sali for di e auto.  Despues a baha esaki y pone riba su cuatro wielnan, pa autoridad forensico por a documenta tur cos den auto.  Finalmente e auto a wordo hisa riba un takelwagen di plataforma pa bay cu ne pa investigacion sigui.

   Famia y amigonan di Jonathan a keda devasta cu e informacion aki.  Tabatin algun observacion cu e hoben a pone recien riba su social media, cu awor su amigonan ta pensa cu tur esaki tabata señal cu e hoben tin mester di hende pa ‘papia cu ne’.

   Amigonan a describi Jonathan como un persona di bon caracter, e stima su famia enormemente, y tin pasion pa deporte di motor, principalmente motorcycle.

   Na su famia, amigo, y conocirnan, DIARIO y tambe Cuerpo Policial ta manda palabra di profundo condolencia.