ORANJESTAD (AAN): Como 34 kilometer pazuid di Waf di Barcadera, bo ta yega na teritorio Venezolano, y aki tin Bajo Baroa. E ta keda un tiki banda di Cabo San Roman riba peninsula di Paraguana, na estado Falcon.
Aki ta unda cu riba Diaranson, Forza Arma Nacional Bolivariana di e pais a logra di kibra record di e cantidad di
paki di droga, y peso cu a worde descubri. E droga aki a wordo haya abordo di un boto tipo peñero. Tur tabata poni den total di 106 bulto grandi.
Autoridad na Venezuela a indica cu e droga ta consisti di exactamente 5.670 paki di droga di tanto cocaina y marihuana.
Ora di haci e revision, a nota cu 3 bulto tabata yena cu 173 paki di cocaina. Esaki a yega na un peso total di 191.1 kilo.
Tambe a bin haya 103 bulto cu tabata yena cu 5.497 paki di marihuana. Esaki a yega na un peso total di 3.277,06 kilo.
E total kilahe di droga cu tabatin abordo di e boto di narcotraficantenan tabata 3.468,16 kilo.
E accion aki a pone cu e droga aki haya na Bajo Aroa a bira e cargamento di mas grandi cu autoridad Venezolano a logra di intercepta den ultimo dos decada aki. Estado Falcon a kibra record di cantidad di paki y kilahe den un solo accion pa dal contrabandistanan un golpi duro.
E biaha aki a detene un persona so, kende ta procedente di Guiria, na estado Sucre. Awor ta bay interoga e persona pa asina haya sa, pa unda e droga tabata destina, y kendenan mas ta su personanan di contacto.
