Buscando e muher bochornoso aki pa loke el a haci den Kerkstraat

Dos dia bentando sushi den ciudad

ORANJESTAD (AAN): Funcionarionan di Bureau City Inspector ta pidi yudansa di comunidad, pa yuda logra identifica e muher bochornoso aki, kende dos dia consecutivo a yega y dicidi cu e acera di Kerkstraat ta bira su Dump Personal.

   Security Camera video a capta e muher aki caba riba Diabierna 1 di Maart 2024 pa 7:20 pm, ora el a yega eynan y benta algo manera un canasta cu yen di sushi aden.  El a lage riba acera, drenta auto y bay.

   E siguiente dia, esta Diasabra 2 di Maart 2024 pa 11:35 am a dicidi pa riba tur su rust, a yega den Kerkstraat cu su auto sedan color scur, a baha y deposita un monton di sushi riba e tereno habri cu tin un tiki pariba di Emmastraat.  Cu su cara di cuero, den dia cla, el a comete e fechoria aki.

   E auto ta parce un Hyundai Sonata di algun aña bieu cu cuatro porta, cu a djis drenta e caya for di Avenida Alo Tromp, a pasa dilanti e cushina di ex-Panaderia Moderna, y a subi acera unda algun decada pasa tabatin e edificio bieu di Pinocchio’s cu a kima.

   E tereno ta limpi y bunita manteni, pero e muher bochornoso bisti cu short di jeans blauw, y blusa roos, canando un tiki fastioso, y cu cabey lora na halto, a baha y a dura como 1 minuut pa habri porta patras, y benta como 4 pa 5 caha yena cu sushi eynan.  Un di e cahana a hasta cay banda di su auto pasobra e muher bochornoso aki no por a ni wanta nan drechi.

   E muher tin cuero color scur, y tabatin slof na pia.  Despues di esaki el a djis cana subi auto, y aleha lagando tur e sushedad aki poni riba acera, y biento mesora a cuminsa zwaai parti di e sushedad cu ta parce di ta foam.

   Esnan cu por reconoce e muher aki, ta ser pidi pa yama Bureau City Inspector na 582-9777.  Pasobra loke el a comete aki ta un violacion di ley, y e lo bay haya un procesverbaal y tambe un boet basta pica pa loke el a haci e Diasabra mainta ey, y pa colmo den centro di ciudad.

   Ban duna un man, y si bo identifica e muher aki, haci bo deber civico y yama autoridad pa duna informacion.  Ban siña e muher aki pa no lubida hamas, cu centro di ciudad no ta un dump publico.