Brommer a pega candela despues di dal un Adulto Mayor riba bicicleta

ORANJESTAD (AAN): Diadomingo marduga, pa mas o menos 3:30, polis a bay cu urgencia pa un atende un accidente serio di trafico dilanti San Francisco di Asis Pro-Cathedral na Playa,

na unda un persona no tabata reacciona. Segun informacionnan, tabata trata di un accidente entre un ciclista y un brommer a sosode, y na prome instante tabata parce cu un persona no tabata reaccionando.

Informacionnan preliminar tabata indica cu e accidente a tuma luga na momento cu un cabayero di edad, poco bebi a subi caminda net dilanti e brommer. Na momento di e impacto, e brommer a dal e ciclista y e brommer a pega candela, resultando cu esaki a kima completamente.

Brandweer y dos ambulance a yega riba lugar. Na prome momento a pensa cu e ciclista no tabata duna señal di bida, pero mas despues a confirma cu esaki no tabata e caso. E homber, cu tabata riba acera, poco a poco a bin bij, mientras cu polis y paramediconan tabata comunica cu ne.

Mientras polis tabata papia cu ne, el a indica cu e ta biba na San Nicolas y cu e ta kere cu un auto a dal’e.

E motociclista a ricibi mas golpi cu e ciclista mes y mester a wordo traslada pa hospital pa haya mas atencion medico.

Segun indicacionnan, e brommer probablemente a pega candela durante e impacto, posibelmente pa motibo cu un chispa a start e candela. Polis ta sigui investigando e causa exacto di e accidente.