Barco di marina Hulandes a yuda intercepta 500 kilo di cocaina

ORANJESTAD (AAN): E barco di marina Hulandes, esta Zr.Ms. Holland a intercepta un cargamento di droga den Lama Caribe riba e anochi di Diadomingo 31 di October. 

Un poco despues nan a logra intercepta e di dos cargamento.  Tur dos biaha e droga a wordo intercepta for di un speedboat tipo Go-Fast, cu nan a obliga pa stop.

   Apenas Diabierna oficialmente a duna informacion di e captura di droga aki.

   Tur cos a cuminza ora cu a detecta e Go-Fast moviendo rapido den Lama Caribe, y mesora e barco Zr.Ms. Holland a cuminza move den su direccion, y alavez a baha nan dos speedboat specializa tipo FRISC, pa asina bay den direccion di e Go-Fast.

   Ora e tripulantenan di e Go-Fast a ripara cu autoridad ta yegando, nan a cuminza benta e contrabanda den lama.  Finalmente oficialnan abordo di FRISC a logra stop nan, y a detene e tripulantenan.  Ora cu a bay recoge e pakinan di droga, nan a logra haya un parti so ainda ta drief.  E resto a bay perdi y a sink.

   Abordo di e Go-Fast no tabatin ningun droga mas.  E tres tripulantenan ta un Venezolano y dos Dominicano.  En total 265 kg. di cocaina a wordo confisca.  E sospechosonan di e contrabando a wordo entrega despues na un cutter di US Coast Guard.

   Apenas un dia despues di e captura aki, e Attack Helicopter Maritimo NH90 di Zr.Ms. Holland a detecta y persigui un otro speedboat tipo Go-Fast riba Lama Caribe.  E tripulantenan aki tambe a ripara esey y a cuminza ta benta e mercancia den lama.

   E barco Zr.Ms. Holland a acerca e Go-Fast cu tur dos speedboat FRISC abordo, cu un team combina di US Coast Guard y Marinierskazerne.  E team di US Coast Guard na final a detene e tripulantenan aki.

   A bin haya 9 paki cu cocaona abordo, cu un peso di 270 kilo.  E sospechosonan y contrabando un poco despues a wordo traspasa pa cutter di US Coast Guard, pasobra nan lo wordo huzga den Corte na Merca.

   E barco Zr.Ms. Holland tabata activo den e region desde luna di Mei.  E barco ta wordo usa pa operacionnan anti-droga, y tambe duna yudanza humanitario.  E ta wordo usa tambe pa varios tarea di Guardacosta den Caribe Hulandes, e.o. buskeda di piscadornan cu ta pisca ilegal, y tambe den yudanza di Search and Rescue.