ORANJESTAD (AAN): E fecha a yega pa pueblo di Aruba acudi na un Stemlokaal, entrega nan ‘Oproepingskaart’,
haya un stembiljet y drenta un urna electoral pa vota pa Eleccion pa Parlamento 2024.
DIARIO ta haci suplica na tur hende pa bay vota! Pasobra cada voto ta conta! Un solo voto por ta e factor pa dicidi kende ta drenta Gobierno of no. Nunca pensa cu bo voto lo no “nifica nada”.
Votamento ta socede awe Diabierna 6 di December 2024 for di 8:00 am nonstop te cu 7:00 pm. Bo por haci uso di paspoort, cedula, of rijbewijs pa identifica bo mes. Corda haci esaki un eleccion husto y legal. Corda su bo bay vota cu carchi di otro hende, esaki por ponebo haya un castigo di maximo 2 aña di prison. Si abo resorta na violencia pa stroba un ciudadano di bay vota, esey por ponebo haya castigo di maximo 4 aña di prison.
Tin biaha hopi votador ta para hopi largo den rij, wardando nan turno pa por vota. Y despues ta sali na cla cu e voto ta nulo, pasobra e persona a marca e hoki cora na forma incorecto. Pa e motibo aki, DIARIO awe ta publica un biaha mas e grafico di e regla con pa marca e stembiljet na forma corecto.
Hoofdstembureau kier recorda tur votado cu no tin un identificacion valido pa identifica su mes riba e dia di eleccion, pa acudi na oficina principal di Registro Civil y Censo pa renoba bo cedula of bo rijbewijs. E ta importante pa cumpli cu e reglanan y pa cada votado prepara su mes pa participa den e proceso di eleccion.
Corda yuda bo grandinan tambe pa nan bay vota, y duna nan yudansa pa cana y yega na Stemlokaal.
