Polis hunto cu BFO a tene razzia riba Diaranson
- Cuatro persona deteni, y confisca hopi placa cash y auto
ORANJESTAD (AAN): Riba Diaranson, Departamento di BFO (Bureau di Investigacion Financiero) di Cuerpo Policial di Aruba a realisa un accion dirigi, den cuadro di un investigacion financiero cu ta bin andando, cu ta hiba e nomber di ‘Caso Venkel’.
E razzia a tuma lugar den colaboracion estrecho cu otro departamentonan di Polis y cu RST (Recherchesamenwerkingsteam). DIARIO a compronde di Ministerio Publico, cu nan a detene un total di cuatro sospechoso y a ristra dos cas (incluyendo uno na Matadera) y tres local comercial, incluyendo un ice-cream shop nobo cu pronto ta habriendo na Shiribana.
Durante e accion, a confisca varios portable data banks, cantidadnan grandi di placa cash y autonan. E detenidonan ta wordo sospecha di a laba cantidad grandi di placa via crypto currency.
Crypto Currency (yama tambe ‘Criptovaluta’) ta placa digital, den cual e almacenamiento y transaccionnan ta core via un red di computer, sin supervision di banco.
Djis pasobra e transaccionnan hopi biaha ta bay anonimamente y atraves di fronteranan internacional, ta mas dificil pa rastrea di unda e placa ta origina.
E tecnologia di crypto currency por wordo abusa pa move ganashinan criminal pafor di bista di proveedornan di servicio of di autoridadnan, cu e meta pa cubri e ganashinan procedente di crimen. Ministerio Publico ta considera labamento di placa como un di e pilarnan principal di criminalidad cu ta mina sociedad.
Labamento di placa ta no solamente un delito financiero, sino tambe e motor di crimen organisa. Sin e posibilidad pa usa nan ganashinan ilegal, criminalnan ta perde nan motibo principal pa comete crimennan: placa!
Pa e motibo ey, e lucha contra labamento di placa ta no solamente un lucha contra cifranan riba un cuenta bancario of den computer, sino un lucha contra e infrastructura completo di mundo baho. Ministerio Publico ta traha di cerca cu varios partner pa combati labamento di placa na manera efectivo. E accion di awe ta subraya cu fluho di placa criminal, no matter con sofistica e por ta, no ta fuera di alcance di Polis.
