Tres sospechoso a keda deteni
- Polis a confirma cu a confisca hopi marihuana y cocaina
ORANJESTAD (AAN): Cu yudansa di investigacion profundo di parti autoridad anti-droga na Aruba, a logra yega riba bon pista cu tabata mustra di ta un operacion di peso grandi pa cu narcotrafico di droga.
Esey a pone cu Unit Narcotica a haya aprobacion di Fiscal, pa asina nan subi caya y tene razzia na diferente adres riba e isla.
Tanto Dialuna y tambe Diamars Unit Narcotica a haci e entradanan hudicial na unda a haci varios detencion y a confisca basta droga.
E prome tabata riba Dialuna 27 di Januari 2025, ora cu Unit Narcotica a pasa Bernadetastraat (Madiki) y durante e razzia a detene dos persona. Esnan deteni door di autoridad hudicial ta e homber di inicial A.M.B.Q. di 46 aña naci na Aruba y e muher di inicialnan Y.M.D. di 35 aña naci na Aruba. Na e cas a haya cocaina y marihuana.
Na mes momento a pasa na un cas na Shiribana (Paradera). Na e cas na Shiribana a haya cocaina y marihuana tambe.
Tur dos sospechoso a wordo deteni relaciona cu bendemento di droga.
Diamars tambe Unit Narcotica a pasa na un cas na Kudawecha y a detene e homber di inicialnan M.L.S. di 86 aña naci na Merca. A detene e dicho persona aki enconexion cu importacion y bendemento di droga. A confisca un cantidad di marihuana na e adres aki na Kudawecha.
Den e accion a participa diferente departamento di Cuerpo Policial. Entre otro K-9, Flex Team, Team di Aresto, CEA y Ministerio Publico.
Mester menciona cu Unit Narcotica ta activo y lo keda activo trahando duro contra benta di droga pa tin un Aruba mas sigur pa nos comunidad y bishitantenan. Por spera mas accion y mas entrada hudicial!
Cuerpo Policial Aruba un biaha ta haci un suplica na tur hende cu sa algo of a wak algo pa yama e tiplijn di polis cu ta 111-41. Corda cu nan ta garantiza cu bo ta keda anonimo.
