Autoridad a gara 2 Venezolano y monton di droga na costa pariba

Dropping di Diahuebs anochi

• Wardacosta a detecta e boto bashi ta drief pariba di Aruba 

ORANJESTAD (AAN): Diahuebs den oranan di anochi departamento di Crimen Organiza trahando conhuntamente cu Polis uniforma di San Nicolas a detene dos persona y haya un cantidad di bulto di droga den un auto.

   Tur cos a cuminza, ora cu e avion Dash-8 di Wardacosta di Caribe Hulandes a bin detecta un boto ta drief riba lama pariba di Aruba.  Mesora nan a core notifica demas personal di Centro MOC, y esakinan a core notifica e pier di Wardacosta na Aruba cu a saca un boto di accion rapido, esta Metal Shark cu a mobiliza pa e area.

   Na mesun momento a notifica Cuerpo Policial, pasobra e chens ta grandi cu e boto aki a caba di wordo uza pa drop droga y a keda abandona.  Esey a pone cu mesora Polisnan a cuminza mobilisa rumbo pa e area.

   E boto di Metal Shark a yega y a topa cu e boto, y a trece aden.  E tabata bashi sin ningun hende riba dje.  Pero abordo tin señal cu tabatin hende riba dje y a haya basta cos reboltea.

   Central di Polis na su turno a informa Departamento di Crimen Organiza, y mesora a traha un team cu hunto cu Polis Uniforma di San Nicolas a mobiliza y bay den accion.

   E team aki a cera e area den Colony pa evita cu hende ta sali di e zona.  Aki ta unda cu patruya di Polkis a topa cu un auto sospechoso.  E oficialnan mesora a drenta den accion, y a stop e vehiculo.

   Pero e auto no kier a stop, y asina a start un persecusion.  Polis a bay nan tras pa para nan pa controla, pero nan no kier a stop.

   E persecusion a sigui y a logra di para e auto te na altura di Juana Morto.  Pero aki e portanan di auto ad al habri, y e tres personanan cu tabata den e auto a sali y huy pa polis den tur direccion.  Polis a logra core bay tras di dos di nan, pero brevemente a perde nan fo’i bista.

   E unidad di Polis a ricibi refuerzo di personal di Crimen Organiza, y nan a cuminsa cu un buskeda riguroso pa por haya e sospechosonan cu a huy. Aki e Helicopter di Wardacosta tambe a bin duna un man pa purba localiza esnan cu a huy, uzando nan ekipo sofistica abordo.  Den un tempo cortico a logra haya dos sospechosonan.

   Nan a wordo deteni y tur dos ta di nacionalidad Venezolano. No a logra haya e otro sospechoso.

   Ora cu Polis a bay controla e auto, nan a canta ‘bingo’.  Pasobra den e auto a haya un cantidad di bulto di droga, y Polis a confisca esakinan. E auto encuestion tambe a wordo confisca.

   Polis no a informa ki tipo di droga, y tampoco e peso cu a ser haya, y net esey ta un informacion importante.  Departamento di Crimen Organiza ta traha incansabelmente pa asina pone man riba esnan cu ta purba drenta cu droga riba nos isla.

   Cuerpo Policial Aruba ta keda haci un suplica na comunidad cu sa algo of a wak algo pa yama riba nan Tipline di Polis cu ta 111-41.