ORANJESTAD (AAN): Hendenan eybanda a tende un auto ta lastra un brake basta largo, y despues a tende desordo ocasiona pa un accident. Mesora banda di 10:00 pm riba Diahuebs anochi, yamadanan a cuminsa drenta na Polis.
Un unidad di Polis di San Nicolas a ser manda na final di Fortheuvelstraat (e caya di Scol pa Polis bayendo pabao), unda cu na e T-weg cu St. Catherinestraat un accident a keda registra, y un auto a dal contra cura di cas.
Ora cu Polis a yega na e lugar, nan a bin nota cu no tin ningun hende herida, pero a topa cu un Toyota Yaris hatchback color di oro cu number A-59040 cu su cuatro wielnan den halto, net dilanti e porta grandi di cura cu ta bay pa garashi di e cas St. Catherinestraat 31.
Bista di Polis a bay tambe riba e rastro largo di brake cu tin fresco riba e caminda, y cu a yega te na e final di caya, unda e auto a bolter. Den e auto tabatin un pareha y nan a wordo acerca door di Polis, y a splica loke a socede. Mas bien e chauffeur di e Toyota Yaris no a regla su velocidad na tempo yegando na e T-weg. Ta basta laat e chauffeur a ripara cu caminda ta cabando, y a primi brake.
Aki ta unda e auto a sigui bay dal contra acera paso over algun mata bolter y keda benta net dilanti e cura di cas. Algun rato despues dos famia a presenta na e sitio pa pone nan mes na altura di locual a sosode.
Como cu no a causa ningun daño na otro persona of propiedad, nan a dicidi cu nan mes lo busca forma pa kita e auto di eynan. Pues na final a laga e auto henter anochi y marduga eynan, y mainta keto bay hendenan cu ta pasando eybanda a keda mira e auto gebolter dilanti e cas.
