Asunto pendiente a resulta den tiramento na Mondi Fierno

ORANJESTAD (AAN):  Diasabra anochi, un aparente accidente a resulta ser mas cu un simpel suceso na Mondi Fierno.

Na principio, polis a pensa cu tabata trata do un boksmento entre un auto y un brommer. Pero den algun minuut, e situacion a cambia completamente ora cu e chauffeur di e Nissan Fuga a acerca polis pa splica kico realmente a sosode.

            Parce cu e ocupantenan di e auto y e dos brommernan por a ta envolvi den un problema mas serio, incluyendo disparonan cu a tuma lugar cu a bin for di esnan ariba e brommernan.

            E chauffeur di e Fuga a opta pa uza su auto pa proteha su mes contra e manehadonan di e brommernan. Despues, e Fuga a bay pega den mondi, mientras e sospechosonan a huy for di e sitio prome cu polis a yega.

            Instancianan concerni manera e departamento di investigacion y e departamento tecnico (BFTO) a presenta na e sitio. A resulta cu e brommernan tabata horta.

            Autoridad a confisca tanto e brommernan como e auto pa conduci mas investigacion. Segun declaracion na e sitio, ta parce cu tabatin un problema pendiente entre e ocupantenan di e brommernan y e personanan den e Nissan Fuga pa algun dia caba.