Asunto di fia placa y despues keda sin paga a escala den hincamento

Caso serio Diabierna anochi na Paradera

ORANJESTAD (AAN): E ta un situacion cu ta ripitiendo su mes hopi na Aruba!  Bo ta fia hende placa pasobra “den urgencia” nan mester di dje, pero despues di esey bo tin di keda roga, yama, y pidi nan cada biaha pa pagabo back.

   DIARIO a compronde recien cu cosnan asina ta hasta pasando awor cu “Wega di Sam”, pues aki tambe mihor bo practica esaki cu hendenan di confianza, y no bay hunga Sam cu hendenan cu bo no conoce.

   Pakico hende ta keda sin paga?  Den pasado DIARIO a yega di publica varios biaha riba e problema aki, y cu tin diferente motibo pa hendenan cu ta keda sin paga back.  Algun di nan ta dificultadnan financiero cu a empeora, hendenan cu ta djis lubida, of hasta intencionalmente evita di topa cu e do؜ño di placa pa page back.  Tambe tin hende cu ta fia placa y no ta pensa mes di paga back.

   Diabierna anochi poco despues di 10:00 pm, un ciudadano cu a realmente fada di keda sin haya placa back, a pasa y mira cu e persona cu tin di pag’e back, ta sinta ta bebe na un Bar & Restaurant na Paradera.  Pues e no tin placa pa paga debe, pero si placa pa bebe.  Loke a pasa despues ta wordo investiga door di Polis.

   Pero Central di Polis cu urgencia a manda unidadnan di Polis di Playa y tambe Ambulance cu urgencia na Anytime Bar & Restaurant riba caminda di Playa pa Paradera pa un caso di hincamento.  Diferente unidad di Polis a yega, y pafo di e negoshi banda di un baki di mata a haya un persona masculino herida sinta abao.

   Polisnan a ilumina cu nan flashlight, y a nota cu e tin herida na su braza banda drechi.  Hendenan a bisa cu e caso a socede pafo di e negoshi, net na e entrada. 

   Personanan cu tabata presente a capta algo di e discusion entre e dos hombernan, y a bin compronde cu esun tabata na e Bar & Restaurant debe e persona cu a yega.  Aki nan a tende di un suma grandi di riba di 10.000 Florin.

   E agresor despues di e bringamento y hincamento, a bandona e lugar den su auto Honda Fit color preto. Un dama cu ta pareha di e victima a keda na e lugar, y tabata duna Polis informacion di mas o menos kico a sosode.

   Despues di algun minuut Ambulance a presenta y a birando e gravedad di e herida na su braza, a opta pa hise riba brancard y bay cune mesora pa Servicio di Emergencia na Hospitaal, debi cu el a sufri un herida basta serio na brasa.

   Polisnan a pidi presencia di e team Forensico di BFTO pa yega eynan pa compila tur prueba di loke a socede.  Durante cu e agente di e BFTO tabata haciendo su trabao, diripiente e agresor a presenta back na e lugar.

   E lo a sinti kizas cu su acto a bay demasiado leu, y el a dicidi pa yega eynan pa duna Polis su banda di medaya.  Sinembargo como cu el a comete maltrato severo, Polis a bay over na detene mesora.  Por a mira cu e tambe a resulta herida na su man cu tabata sangrando.  Awor ta Recherche lo bay papia cune pa haya sa su storia.

   Cu Vehiculo di Transporte, e detenido a wordo hiba Warda di Polis na Shaba, unda lo presente dilanti Fiscal Auxiliar.