ORANJESTAD (AAN): Tabata Diahuebs madruga banda di 2:50 am, cu un unidad di Polis di San Nicolas a ser manda na Vanco Hardware Store situa den Pastoor Hendrikstraat, como cu eybanda tin dos ciudadano cu a wordo asalta.
E unidad di Polis cu a yega eybanda, na altura di un cas den Bernhardstraat, nan a worde para pa un ciudadano banda di caminda. Polisnan a ripara cu ta trata di e dos ciudadanonan aki.
Ora cu polisnan a baha for di patruya, nan a worde acerca y e ciudadano di inicial I. tabatin su cara completamente na sanger. Polisnan a constata tambe cu cara di e victima ta hincha y e tin un herida di cap nan banda robez di su cabez.
Polisnan a papia cu I. y el a declara cu e hunto cu su amigo a worde asalta pa tres mucha homber.
E victima a splica Polis, cu na comienzo nan auto a haya flat tire altura di Citgo San Nicolas y nan a haya nan mes obliga pa para y cambia e tire. I. alavez a declara tambe cu nan a worde acerca pa dos hoben desconoci.
- a declara tambe cu un di e hobennan tin un jack di hisa auto, y a ofrece nan yudanza. Tambe I. a declara cu e hoben no tabatin e herment pa los bolts di wiel. Pero el a ofrece e dos ciudadanonan un lift pa hiba nan cas, pero lo cobra $20 pa esey.
Un di e hobennan a bisa cu su nomber ta V. Y ora cu nan a drenta e auto di e hobennan aki, esun cu a bisa cu e yama V., a bisa cu e lo pasa busca su primo prome.
Ora cu nan a yega cerca di un cas, diripiente e hobennan a baha y forza e dos ciudadanonan pa nan baha, y a cuminza maltrata nan. Un di e hobennan a saca un cuchiu, y e otro hoben a bin cu un piedra y a dal esaki riba su cabez.
E hobennan aki a logra di kita $300 cu e tabatin den su poder.
Mientras cu Polis ta papiando cu e victima I., finalmente e otro victima di inicial G. a yega. El a bisa Polis casi mesun storia, esta cu nan a wordo asalta na forma violento. Polis a mira cu victima G. tin boca hincha y tambe frenta ta hincha.
E victima G. a bisa cu nan a wordo asalta door di cuatro hoben. Tur cos a cuminza ora cu nan a acepta yudanza y a drenta e Suzuki Swift di e persona cu a identifica su mes como V.
E caya unda e cas ta caminda nan a wordo maltrata, ta desconoci pa e persona. El a bisa cu e ta na altura di e Imagen di Mama Maria, y aki a tuma e caminda di santo na banda drechi. Diripiente e auto a stop, y un di e hobennan a sali di e vehiculo pero no a mira su cara, como cu henter rato e tabata sinta cu lomba pa nan.
El a declara cu V. despues a reverse e auto, y a bira man drechi y a sigui core direccion panort te ora cu a yega na un muraya blanco. El a confirma cu e hobennan a forza nan pafo di auto, y a cuminza maltrata nan.
El a bisa cu nan a bay cu su cartera conteniendo 1.400 Florin, tambe su ATM Card di Aruba Bank, y carchi di Bancomatico di CMB Bank, y tambe su smartphone.
El a bisa cu e caso aki a socede banda di 1:30 am, y cu nan a keda cana straight, te ora cu por a pidi yudanza di Polis.
Polis a pone Recherche na altura, y como cu e victimanan tin heridanan fuerte, a pidi presencia di Ambulans.
E auto cu wiel daña di e victimanan, a wordo hiba cu takelwagen te na Warda di Polis. Awor un investigacion grandi ta andando pa cu e maltrato violento aki madruga riba caya.
