“Echonan den dicho publicacion ta mustra di a wordo haci riba speculacion y sensacion”
ORANJESTAD (AAN): “Como altocomisario di Cuerpo Policial Aruba mi ta sintimi obliga di reacciona riba un relato cu a aparece den un website local di 30 juni 2025 cu a wordo publica den medianan social, na unda mi integridad y di Cuerpo Policial Aruba ta wordo treci den duda.
No solamente e noticia no ta cuadra cu e berdad, pero ta uno sugestivo y ta basa riba un analisis unilateral.
E acusacionnan haci den e articulo, entre otro proteha echonan castigabel, sconde informacion y recompensa empleadonan basa riba comportacion no-etico, no tin base.
Echonan den dicho publicacion di EaNews ta mustra di a wordo haci riba speculacion y sensacion.
Manera den tur caso cu tin señal di un posibel crimen ta haci un investigacion interno. Basa riba e investigacion a wordo dicidi y conclui cu no tabata tin mas motibo pa persigui. Tambe a pone e echonan y e investigacion den un proces-verbaal y despues entrega na Ministerio Publico. E resultado no a wordo tuma lihe, pero ta un resultado di un proceso cuateloso y cu ta cumpli cu normanan legal y organisatorio.
Loke ta particularmente preocupante ta cu den e articulo ta asta menciona echonan cu no ta berdad di un fayecido, na unda ta sugeri cu informacion a wordo scondi.
Sugerencianan asina no solamente ta robes pero tambe dañino y testigo di un gran falta di respet pa comparti informacion corecto.
Loke ta hala mi atencion y ta tocami personalmente, ta cu den e articulo ta referi na e echo cu mi ta ocupa un funcion di un yiu di tera.
Mi descendencia ta wordo presenta como posibel motibo dicon mi lo actua den interes di cierto personanan.
Insinuacionnan asina no ta solamente falso pero tambe discriminatorio.
Nan ta aporta na un incriminacion di personanan a base di nan descendencia y ta trece desconfiansa den personanan cu no ta yiu di tera den posicionnan clave.
Mi ta enfatisa: ley ta igual pa tur hende. Ningun empleado den KPA, sin importa su origen, funcion, ta wordo protehi contra ley of privilegia den cuadro di estado di derecho. Integridad no ta wordo determina door di lugar di nacemento pero cu echonan.
Como hefe di polis mi ta respeta completamente libertad di prensa. Periodismo critico ta di hopi importancia pa un bon estado di derecho. Pero cu e libertad aki tambe ta bin cu su responsabilidad.
Informacion unilateral, analisis incompleto y trece supuesto echonan cu no ta cuadra cu e berdad ta pone desconfiansa tanto den media como e publico.
Apesar di e situacion aki Cuerpo Policial Aruba ta keda para pa transparencia, integidad y semper recto.
Nos ta haci un yamada na e medianan pa den futuro sigui informa cu cautela, respetoso y basa riba echonan den interes di e sociedad (pueblo)”, asina Altocomisario Ramon Arnhem a finalisa bisando.
