Alarma bati ora cu turista femenino diripiente a desaparece

Buskeda cu boto y helicopter bispo di Aña

ORANJESTAD (AAN): Alrededor di 4’or y pico di Diadomingo atardi, notificacion a drenta via Centro MOC di Wardacosta di Caribe Hulandes, cu lo tin un turista femenino cu a bay snorkel for di mainta caba, y te na e momentonan ey e no a regresa.

   Marine Operation Center a pone Cuerpo Policial di Aruba na altura di e caso aki cu a socede banda di e pier cerca di e compleho di condominium cu ta awor, unda antes tabatin Brisas del Mar Restaurant na Savaneta.

   E personanan cu a bati alarma, inicialmente nan mes a bay check banda di ex-Brisas del Mar, y a bin topa cu su pertenencianan, pero e dama mes no tey.  A wordo avisa cu ta trata aki di un dama di 35 aña di edad, naci na Merca.

   Wardacosta a informa Polis di Aruba, cu nan ta sacando e avion Dash-8 for di Curaçao pa bay bula riba e area di Commandeursbaai den e buskeda.  Polisnan a informa cu nan ta bayendo den e area cu e Helicopter di Polis, y lo ta riba lama tambe cu e boto ‘Justice’.

   E momento ey tabata un ora cu ta hopi vuelo ta subi for di Aeropuerto, pues Toren di Control di Aeropuerto Internacional Reina Beatrix tabata evita cu avionnan tabata bula abao riba area di Savaneta e atardi ey, pa evita conflicto den aviacion.

   Detecta door di Helicopter: Tabata e Helicopter di Polis cu a bin nota cu e muher ta keto bay Snorkel na altura di Aruba Beach Chalets y demas condominio cu tin un poco pariba di Santo Largo.

   Algun turista eybanda mes a core drenta awa pa asina yuda saca e turista di lama.  E lugar ey ta como 510 meter mas pabao for di Brisas del Mar, pues el a cubri un area basta grandi.  Ambulans tambe a yega eynan, pa asina check su señalnan vital.  E persona tabata basta cansa, y paramediconan a indica cu ta bon idea pa bay cune Hospital pa mihor saminacion.

   E informacion oficial ta cu e turista su situacion ta stabil, el a worde hiba pa Hospitaal unda cu lo haci check-up mas profundo.  Kico exacto a pasa cune cu el a keda asina hopi den awa, no a wordo divulga na prensa.