Agente policial Eric Ras lo disfruta di su pensioen bon mereci

Despues di 42 aña di servicio pa Aruba

ORANJESTAD (AAN):  Entre su amigonan, coleganan y hefe agente policial Eric Alvin Conrad Ras a despedi di Cuerpo Policial Aruba.

   Tabata na aña 1982 cu Sr. Ras a drenta den servicio di Antillas Hulandes. Despues el a sigui desaroya su mes y a drenta Scol di Polis na aña 1983 cu e tempo ey tabata situa na Isaac Wagemakerstraat.

El a termina su estudio policial cu exito. Tabata riba 10 di november 1984 cu el a termina su estudio policial y a cuminsa na Warda di Polis Oranjestad. Na october di aña 1989 el a bay traha na Warda di Polis Noord.

Den aña 90 Noord tabata encarga cu Santa Cruz y Paradera. Sr. Ras no a para keto y a sigui desaroya su mes y a forma parti di Riot Team cu awendia ta Mobiele Eenheid. 

Durante su trayectoria policial tabatin 3 districto, San Nicolas, Oranjestad y e buitendistricten (St. Cruz, Paradera y Noord). Na aña 2005 el a forma parti di inmigracion y parti di Strand Politie. Na final di su carera policial na 2012 te cu 2025 el a forma parti como coordinador di e departamento di Permiso di Polis na Oranjestad. 

Cu un amplio experiencia di un total di 42 aña sirbiendo pa pais Aruba, Sr. Ras a mira y biba cu e cambio cu e introduccion di Status Aparte na Aruba, entrada di tecnologia moderno pero tambe a mira e Cuerpo crece for di chikito te cu awe na unda e Cuerpo ta. 

Un momento cu nos ta para keto y gradici sr. Ras pa su esfuerso, dedicacion, experiencia, liderazgo pero tambe un baluarte cu a hiba su Pais Aruba dilanti pero tambe su Cuerpo Policial.

Sr. Ras disfruta di un bo pensioen bon mereci y danki na bo famia pa e sosten durante 4 decada y pa hiba bo Pais dilanti. Sigur un honor y aprecio cu bo a forma parti di e famia blauw. Semper nos portanan ta habri pa ricibi bo bishita cerca nos. Disfrute!