Adicto Ambulante a wordo ataca riba caya pa kita su placa di onderstand

ORANJESTAD (AAN): Diahuebs anochi banda di 9:00 pm, Central di Polis a dirigi patruya di Playa

pa bay den Kruisweg pa check un pelea andando.  E caya aki ta situa cerca di Warda di Polis bieu situa den Wilhelminastraat.

   Na prome instante testigonan a pensa cu un persona posiblemente a worde hinca durante e pelea. E pelea tabata entre dos adicto ambulante.

   Polisnan cu tabata cerca a yega basta lihe, y a nota cu e adicto ambulante supuestamente herida no a worde hinca, pero si a ricibi golpi.

   Polis a papia cu e victima, y el conta cu e otro persona mas grandi di estatura cu ta bisti na short preto cu shirt preto, cu curpa tiki ancra, a bringa cu ne y a kita 150 Florin fuera algun cos mas for di dje.

   Segun e adicto ambulante a splica, e persona a horta su placa di onderstand. El a sigui bisa polis cu e ta sufri di curason y despues a cay sinta abao.

  Poco mas pabou den Oranjestraat cerca unda antes tabata ex-Interbank, polis a topa cu e otro adicto curpa ancra bisti na preto, y mesora a detene y pone den boei.

   Locual muy probablemente a sosode ta cu e adicto lo debe droga y mester paga, pues a bay “cobra” esaki awor cu el a haya placa di onderstand.

   A pidi pa transportwagen cu lo hiba e agresor warda y eynan un Fiscal Auxiliar lo dicidi locual lo sosode cu ne.