Actuacion rapido di Bombero a evita cu cas a kima completamente

ORANJESTAD (AAN): Tabata Diabierna anochi algo prome cu mey anochi, cu Central di Polis a manda un patruya di Santa Cruz rumbo pa un cas na Hooiberg,

como cu hendenan ta mirando huma ta saliendo di eynan.

   Mesora a avisa Centro di Alarma, cu a saca un unidad di Tanki Flip y tambe di Kazerne Aeropuerto rumbo pa eynan.

   E prome unidad di Polis cu a yega, a bin nota cu hopi huma ta saliendo for di e cas, cu ta completamente cera.  Nan a nota cu bao di e garashi tin un auto staciona.  Nan a raporta esey mesora, indicando cu Bomberonan tin di yega mas rapido.

   E prome unidad di Bombero a yega, y a evalua mesora e situacion.  No sa si acaso tin hende den e cas cu por ta drumi of fo’i tino, y pesey a kibra un porta di e area di garashi pa bay paden, pa asina check esey.  E momento ey e otro unidad di Bombero a yega, pero a djis keda standby.

   A bay busca rond, pero no tabatin ningun hende na cas e momento ey, pero si e tabata yen di huma.

   E holor cu por a sinti di pafo ta manera algo cu ta palo ta kimando.  Aunke no ta conoci pa prensa kico a start e candela, toch Bomberonan a logra haya e origen y a paga esaki. Despues nan a habri porta y bentana pa huma por sali, pendiente yegada di habitantenan.

   Pues e trabao rapido di Polis y Bombero a yuda evita cu e cas lo por a kima completamente!