Accidente basta pisa mainta tempran riba e brug di Lagoen

Chauffeur a pega soño tras di stuur --- ORANJESTAD (AAN):  Diabierna mainta, den transcurso di 9'or, un otro desgracia a sosode riba e caminda principal, basta transita di L.G. Smith Boulevard, riba e brug di Lagoen.

Akinan tabata tin dos auto envolvi. Nan a dal contra otro basta fuerte. E chauffeurnan lo mester tabata core basta duro pa por a haya nan mes envolvi den un accidente asina unda tur dos auto a keda cu basta daño. Ta trata di Chevrolet Comfort y un Suzuki Swift.

E accidente aki cu a sosode net banda di e Cas Ceremonial di Gobernador. Informe ta indica cu un auto a bay bira dilanti di e otro pero esaki a resulta den un impacto basta pisa.

Door di esaki, un hende muher cu tabata den e Suzuki na e parti patras a resulta herida y a rekeri atencion di personal di ambulans. Tabata tin un mucha chikito den auto cu a keda hopi spanta.

E chauffeur di e Chevrolet a laga sa cu el a caba di traha di anochi pa madruga y cu el a pega soño tras di stuur.

E accidente aki a causa basta stagnacion tambe den trafico e momento ey y Polis mester a cera e caminda pa atende cu e sucedido pero tambe pa desvia e trafico bayendo pabao. Esnan bayendo pariba si mester a arma cu un tiki pasenshi ya cu e rij tabata basta largo.

Daño na e dos vehiculonan tabata considerabel.