Accident violento a cobra bida di e hoben Ray Zambrano

E di tres morto den Trafico

ORANJESTAD (AAN): E impacto tabata uno fuerte!  Habitantenan di e casnan mas pariba mes a spierta door di e sonido duro aki.

   Di e forma ey mas y mas yamada a cuminza drenta na Central di Polis riba Diadomingo marduga.  E prome yamada a drenta pa 3:25 am, unda alarma a ser bati na Central di Polis cu un accident basa grave a caba di socede den e area di Avenida Nelson Oduber, na altura di ex House of

Cheng.

   E prome unidad di Polis cu a yega eynan, a bin topa cu un situacion dificil.  Un auto compacto Nissan March color shinishi cu number A-65717 a baha di caminda y violentamente a troce rond di un palo di mata, y despues kita bek pero lagando e vehiculo tur kibra.  Aunke e airbag na e stuurwiel di e auto a activa, toch mayoria di e impacto a bin dal for di banda.

   E unidad di Polis cu a yega, a topa cu ciudadanonan cu tabata tratando di practica CPR y reanima e victima.   Esey a pone cu Polis a bolbe pidi Ambulans pa yega mas rapido eynan.

   Na momento cu Ambulans a yega na e lugar, Paramediconan a tuma over cu CPR, y a pone aparato pa observa e señalnan vital di e victima masculino.  Nan a haci nan maximo esfuerso pero no por a haci nada mas pa e victima.

   Despues di esey, Ambulans a pidi Centro di Alarma pa manda busca Docter, como cu e persona tras di stuur no ta reacciona mas.  Di e forma ey, pa 4:09 am Dr. Mungra a constata morto di Ray Kelvin Zambrano Burgos naci 18 december 1996 na Aruba, pues tin 26 aña di edad.

   Polis a cera e caminda completamente pa conserva tur prueba riba caminda, y pesey Polis di Trafico y tambe oficialnan forensico di BFTO a presenta na elugar pa haci nan investigacion.

   Bureau Slachtofferhulp tambe a presenta na elugar pa brinda sosten na famia di e fayecido.

   Ray pues di e forma ey a bira e di 3er morto di trafico pa 2023.  E ta conoci como un deportista, activo den Futbol y ta hunga pa SV Unistars.  E ta un hungador stima cerca su coleganan.

  DIARIO y Cuerpo Policial ta manda palabra di profundo condolencia na famia di e fayecido y deseanan forza den e dianan nos dilanti.