Accident fuerte na Sero Patrishi a ocasiona lesion na tres persona

ORANJESTAD (AAN): Tabata Diasabra anochi laat, cu diferente unidad di Polis como tambe Ambulance a mobilisa cu urgencia pa e caminda di Oranjestad pa Paradera,

net dilanti di Dixie Bakery & Donuts na Sero Patrishi, net cerca di e T-weg pa bay San Barbola.

   E prome patruya di Polis cu a yega, a bin nota cu ta trata di impacto entre dos auto, y na final uno a keda para panort di caminda, y e otro banda pazuid, y ambos cu basta daño material.

   E dalmento a socede debi cu e chauffeur masculino di un auto sedan Dongfeng Shine color blanco cu number A-80996 bahando for di Paradera rumbo pa Playa, no a regla su velocidad na tempo y a bay dal cu impacto fuerte tras di un vehiculo tipo MPV di marca Honda Mobilio color blanco cu number A-82789.

   Den e accident aki, e chauffeur masculino di e Dongfeng Shine a resulta herida.  E chauffeur femenino y un dama pasahero den e Honda Mobilio tambe a resulta herida.

   Tur tres a wordo hiba cu Ambulance rumbo pa Hospital pa observacion medico.  E investigacion ta awor den man di Polis di Trafico.