ORANJESTAD (AAN): Diaranson merdia na momento cu awacero ainda no a cay, a surgi un accidente riba Watty Vos Boulevard bayendo zuid net un tiki prome cu yega na e rotonde banda di FCCA, cerca di Sabana Blanco.
Pa un motibo of otro, chauffeur di un Mercedes Benz CLK color silver cu number A-4166 no a regla su velocidad na tempo y a bay dal tras di un Toyota Vitz color shinishi scur cu number A-47929.
E momentum di e impacto, a pone cu e Toyota Vitz a baha di caminda banda robez, ranca par di mata, y dal duro contra un palo di luz.
E Mercedes-Benz mes a baha na otro banda di caminda, y a dal den un pida largo di vangrail. E vangrail a fungi corectamente, pasobra e no a laga e Mercedes-Benz cay den e pida hundo net pabao di e Boulevard.
Un persona den e Mercedes-Benz a resulta herida y cu Ambulans a ser transporta pa Hospital. DOW y e contratista di Watty Vos Boulevard a analisa e situacion, y como cu e palo di luz ta forma un peligro, e profesionalnan di DOW a dicidi cu banda di 4’or di atardi a cera un parti di e via aki pa asina por kita e palo di luz.
E potretnan aki pa cortesia di DOW Social Media.
