Ministro Rocco Tjon encuanto Cuerpo Policial:
- Uniformnan nobo lo yega na December awor
- Tur Polis lo bay haya nan mesun portofoon
ORANJESTAD (AAN): Den fin di siman, Minister di Husticia y Asuntonan Social sr. Rocco Tjon, a reuni cu Sindicato di Polis di Aruba (SPA), un reunion sumamente positivo caminda a duna splicacion riba diferente punto, principalmente uniform pa Cuerpo Policial. Manera ta conoci, tur diabierna Ministerio di Husticia y Asuntonan Social tin e espacio habri, pa reuni cu SPA, pa delibera diferente puntonan.
Uniform di Polis: A toca e parti di uniform pa Cuerpo Policial, cual ta un punto di preocupacion pa SPA, di cual a haya un splicacion amplio di e proceso pa loke ta trata e parti aki. Recientemente e pago a worde haci na e compania di Hulanda cu a gana e destaho, y a conta cu e preferencia di Cuerpo Policial. Pues, si tur cos cana segun planeamento, pa December di e aña aki, e uniformnan aki lo worde entrega. Tur e midinan a worde manda pa e compania, pa asina nan por cuminsa fabrica e uniformnan.
Takelmento di auto: Otro topico cu a toca, ta e parti di trafico, e proyecto di “takel en bewaardienst” ta andando, caminda un compania externo ta bay maneha henter e proceso aki pa Cuerpo Policial. Di e forma aki, ora un Agente Policial tuma nota cu un auto no ta cumpli cu e rekisitonan nan por kita e auto aki for di caminda y e ta worde hiba na e compania aki, cu ta cumpli cu tur e criterianan segun ley. Asina lo bay garantisa mucho mas siguridad den trafico, e contract ta cla y lo worde revisa aworaki.
Computer den patruya: Ademas a papia tocante e mobile dataterminals. Manera ta conoci, Cuerpo Policial a haya vehiculonan completamente nobo, y un di e puntonan cu a percura pa hinca den e destaho ta, pa por bay instala e mobile dataterminals, cual ta computernan cu lo worde instala den e patruyanan di Polis, pa asina nan por brinda un miho servicio y alavez ricibi mas informacion pa di e forma ey eleva nan propio siguridad. E proceso aki a cuminsa caba, caminda e oferta pa loke ta trata e proyecto piloto a worde entrega y dentro di poco lo cuminsa cu e instalacion di e prome vehiculonan cu e mobile dataterminals.
Walkie-talkie: Por ultimo, a papia tocante e proyecto di portofoon, cual ta uno sumamente importante tambe pa Cuerpo Policial y ta forma parti tambe di e Operation Command Center. Tur cos ta canando segun planeamento y e comision cu a cana henter e proceso aki, a haci nan escogencia y pa oktober di e aña aki tur portofoon lo worde entrega na Cuerpo Policial. Pa prome bes a scoge esaki, caminda cada Agente Policial lo haya su propio portofoon pa asina por garantisa mas integridad pa loke ta trata e aspecto aki pa e Agentenan Policial.
