ORANJESTAD (AAN): Dr. Sharline Vis ta e presidente di Fundacion Diabetes Aruba y el a duna di conoce cu e ta masha contento cu e programa PRISMA,
cual a wordo introduci caba na Aruba na aña 2019, ta haya atrobe un tiki mas bida door di e sosten financiero cu e ta haya di Pan-American Health Organization (PAHO).
El a bisa cu e programa di PRISMA ta un programa hopi importante pa Aruba. E ta un programa cu no ta Aruba a introduci. Ta un programa cu a mustra su efectividad na Hulanda y Inglatera.
Fundacion Diabetes ta un organisacion cu ta pone hopi enfasis riba tur cos cu tin di haber cu e malesa di diabetes tipo 1 y tipo 2. E programa di PRISMA ta enfoca riba e personanan cu ta biba cu e malesa di diabetes tipo 2, a remarca, door cu e ta un malesa cu ta hopi prevalente aki na Aruba y henter mundo.
Na Aruba tin entre 8500 pa 8700 persona cu ta registra na AZV y cu ta uzando remedinan pa diabetes. Di e cantidad aki tin un grupo chikito cu ta e personanan cu diabetes tipo 1. Esaki ta un tipo di diabetes cu ta presenta na mucha y durante adolescencia. E ta totalmente un otro tipo di diabetes cu e tipo 2, Dr. Vis a indica.
Pa diabetes tipo 1 y tipo 2 ta importante pa pone hopi enfasis riba e estilo di bida. "Diabetes ta un malesa cu ta bin cu nos estilo di bida ta full for di balansa y nos ta focus akinan riba e obesidad. Hendenan cu tin hopi problema cu sobrepeso y acumulacion di vet rond di e organonan den barica. Esaki ta e hendenan cu a lo largo por desaroya diabetes tipo 2", a bisa.
Banda di esaki tin e factor genetico. Ta wak diabetes hopi den loke ta raza di hendenan cu tin na Aruba cual ta di descendencia Africano of Indjan di Caribe. Cu esaki ta bira mas sensibel pa desaroya diabetes tipo 2, e experto a señala.
Tin hende cu ta kere cu lo ta facil pa trata diabetes cu remedi so, pero esey no ta e caso. Si ta un malesa cu ta wordo ocasiona door di un estilo di bida for di balans, e ora tin cu trata e diabetes ey tambe pasobra sino ta "mop cu un crenchi habri".
