No obstante retraso
ORANJESTAD (AAN): Informacion di Den Haag ta indica cu Minister Plenipotenciario demisionario mr. Ady Thijsen ta desea ta ramarca cu e proceso di renobacion di e edificio di Kabinet di Minister Plenipotenciario di Aruba na Hulanda ta canando bon, no obstante di un retraso. Esaki segun e mandatario ta debi na rekesitonan nesesario den e proceso preparativo pa un proyecto asina grandi.
Sr. Thijsen ta emiti e declaracion aki debi na articulonan den medianan di comunicacion na Aruba, referiendo na su entrevista cu 24ora.com. Den e entrevista aki Minister Thijsen unicamente a bisa cu e preparacionnan ta casi cla, cu tin burocracia ta hunga un rol y cu su persona ta desea pa cuminsa cu e renobacion pa asina e edificio lo ta cla na December otro aña pa tene un re-apertura na 2026, e aña cu Aruba ta celebra 40 aña di Status Aparte. Segun e mandatario den e entrevista e lugar ta bay keda hopi netchi y ta spera cu tur cos cana bon pa e renobacion tuma lugar.
Minister Thijsen a papia den e entrevista cu e team di Kabinet di Arubahuis ta haciendo un bon trabao, cu un director nobo na cabes di e organizacion. Tambe sr. Thijsen a para keto na e contactonan intensivo cu Kabinet di Arubahuis a bin ta tene cu studiantenan Arubiano, cu segun Minister Thijsen ta e futuro di Aruba.
Finalmente Minister Thijsen ta lamenta cu den e articulonan basa riba e entrevista a hinca hechonan cu no a worde bisa den e entrevista y alavez cu nan no tin nada di haber cu e proceso di renobacion di Kabinet di Arubahuis. Asina ta crea un malconcepto di su declaracion riba e tema aki den e entrevista cu e media local.
