Fiscal a exigi 11 aña di prison p’e
ORANJESTAD (AAN): Recien den Corte di Husticia a trata un caso penal contra 4 sospechoso di asalto arma. E grupo aki ta wordo sospechoso di a haci asalto arma riba un supermercado y un pareha.
Loke a capta atencion durante tratamento di e caso, ta cu un di esnan den e grupo, esun cu tabata mayoria di biaha arma, Pedro Leon Diaz (32), a haci asalto arma na Caribbean Cinemas dia 27 November 2019 y a huy bay bek Venezuela. Dos aña despues e ta bolbe y haci dos asalto.
DOS ASALTO ARMA
E otro dos asaltonan cu Pedro Leon Diaz a haci hunto cu e otro tres sospechosonan tabata dia 19 Juni 2021 na Yanana Supermarket y dia 3 Juli 2021 a asalta un pareha caminda a secuestra nan y a bay cu e homber na e cas y bay cu un cantidad di placa.
Ora el a wordo gara aña pasa hunto cu e grupo, el a admiti di a haci e asalto arma na Caribbean Cinemas caminda a bay cu 8 mil florin riba 27 November 2019. Un empleado a laga e porta di patras habri y el a wordo condena pa esaki.
Na Yanana Supermarket dia 19 di Juni 2021, Pedro Leon Diaz tabata esun cu un pistol. Den Corte el a bisa cu e pistol ta di plastic. Nan a bay cu 600 florin.
Dia 3 Juli 2021, Pedro Leon Diaz hunto cu un otro a bay na un cas bao construccion y a asalta e pareha. Nan a mara nan cu tape y a bay cu e homber na e cas di e pareha caminda nan a bay cu 16 mil dollar y un cantidad di joyas y aparatonan electronico.
FISCAL A BAHA PISA
Fiscal a remarca cu despues di a haci e asalto arma na Caribbean Cinemas na 2019, dos aña despues Leon Diaz ta bin Aruba y ta haci 2 asalto arma.
Fiscal a exigi 11 aña di prison p’e. Fiscal ta haya cu mester manda señal bon cla cu no ta tolera e comportacion aki.
Awor Hues ta bay evalua henter e caso y otro luna por spera sentencia.
