ORANJESTAD (AAN)– Corte di Husticia diahuebs mainta a trata e caso penal cu Ministerio Publico a cuminsa contra e homber J.D. pa maltrato cu un arma.
E homber J.D. ta wordo acusa di a maltrata dama D. y e homber K. cu un arma riba 12 Februari 2020. Ta asina cu e dama D. ta e ruman muher di J.D. y e homber K. ta e pareha di e dama D.
E pareha a presenta den sala di Corte y a wordo representa pa abogado mr. Canwood. E sospechoso J.D. a presenta cu abogado mr. Illes. Mr. Canwood a presenta un demanda di daño inmaterial di 10 mil florin pa D. y K. Ademas el a presenta cu daño na auto di K. na razon di 3 mil florin. Tambe el a presenta gastonan di abogado. El a bisa Hues cu D. a sufri sla na cabez y pia mientras cu K. a kibra un man.
E abogado a mustra cu K. ta ponedo di klinker y no por a traha cu man kibra. El a demanda 4 luna di salario. E abogado a bisa cu e ruman muher D. a keda cu molester di e sla na cabez. Mustra cu ainda J.D. ta menaza e pareha y tin pensa cuminsa un caso pa prohibi J.D. bin den nan cercania.
MALTRATO
Hues a mustra cu J.D. lo a maltrata e pareha cu un pida tubo di hero. J.D. a bisa Hues cu 12 Februari 2020 e tabata drumi. Su tata a lant’e y su ruman muher a bay haci fastioso na su apartamento. Despues e ruman muher a atak’e pasobra J.D. no kier a lag’e drenta den e apartamento. Tur e discusion y violencia ta relaciona cu pagamento di coriente y awa, caminda J.D. a dicidi di corta coriente.
J.D. a bisa Hues cu durante e confrontacion cu su ruman muher D., e ruman muher a yama K. y K. a dal’e cu un palo di basora. J.D. a rabia asina hopi y a pasa man pa un tubo di hero y a dal D. Despues K. a dal’e cu un cabel y el a dal K. cu e tubo di hero. Segun J.D., K. no ta permiti pa bin na e cas. Nan a sigui bringa bay pafor. El a desmenti di a kibra e auto di K. El a bisa cu ora e pareha a core bay den auto, el a yama Polis.
Hues a bisa cu Polis a constata cu D. tabatin herida y hincha na cabez. Tambe sla na pia. Mientras cu K. a sufri un man kibra.
Hues a bisa cu no tin nada di cu K. a dal J.D. cu e palo di basora. Segun J.D., K. a dale na su cabez.
FISCAL
Fiscal a bisa Hues cu e ta haya legalmente proba cu J.D. a maltrata su ruman muher D. y e pareha K. J.D. mes ta admiti di a maltrata nan cu un tubo di hero. E pregunta ta kende a cuminsa cu e problema y si J.D. mester a defende su mes. Na opinion di Fiscal, e hecho cu e ruman muher D. a bay na e cuarto no ta motibo pa J.D. dal’e cu un tubo di hero. Tabatin discusion riba pagamento di coriente y awa. Fiscal a bisa cu e no ta kere cu loke J.D. a bisa cu K. a dal’e cu un palo di basora. No ta mira cu J.D. mester a defende su mes cu un tubo di hero. K. a sufri fractura na man. Fiscal ta considera esaki maltrato cu arma. El a bisa cu te ainda e rumannan tin problema cu otro.
Fiscal a exigi 150 ora di trabou pa comunidad di cual 50 ora ta condicional cu un tempo di prueba di 2 aña.
RECHAZA DEMANDA DI DAÑO
Pa loke ta e demanda di daño, tanto D. como K. a exigi daño inmaterial di 10 mil florin. Fiscal a bisa cu e no ta haya cu ta splica esaki suficiente. No tin informacion si ainda nan tin molester y ta siguiendo tratamento. El a pidi Hues pa declara esakinan no admisibel. Tambe Fiscal a pidi pa declara no admisibel e daño na auto y tambe e placa di salario di K. E asunto di auto no ta bin dilanti den e caso. Tambe el a pidi declara no admisibel gastonan di abogado.
ABOGADO
Abogado mr. Illes, a bisa Hues cu ta e ruman muher a bay na cuarto di J.D. y discuti y dal’e. Despues ta K. ta dal J.D. cu palo di basora. Despues K. ta dal J.D. cu un cabel. E abogado ta haya cu J.D. mester a defende su mes. Ta J.D. a yama Polis. Esey ta mustra cu J.D. no a haci malo manera ta purba pint’e awor. E abogado ta haya cu J.D. a actua den defensa propio. El a remarca cu den henter e caso aki no ta papia nada di destruccion di auto. Ta den demanda di daño ta papia di esaki. E ta haya cu no por aproba esaki. E abogado ta haya cu mescos cu Fiscal mester declara demanda di daño no admisibel. El a bisa cu no tin ningun splicacion pa cu e gastonan pa haci demanda di daño.
SENTENCIA
Hues a sera tratamento di e caso y a dicta sentencia di biaha. Hues ta haya cu a keda legalmente proba cu J.D. a maltrata su ruman muher D. y su pareha K. cu un tubo di hero. Hues no ta haya cu J.D. a actua den defensa propio. El a bisa cu por compronde cu J.D. no tabata kier pa D. ta den su apartamento. Pero esey no ta hustifica cu ta bay dal cu un tubo di hero. No tin nada cu K. a dal J.D. cu palo di basora. Hues ta haya cu e homber K. a bay defende D. ora el a mira cu J.D. a dal’e cu un tubo di hero. El a dal J.D. cu un cabel y J.D. ta dal’e cu un tubo.
Hues ta haya e exigencia di Fiscal na su lugar pero el a duna menos. El a bisa cu e ta tene cuenta cu J.D. a wordo ataca den su apartamento. El a condena J.D. na 120 ora di trabao di cual 40 ora ta condicional y 2 aña di prueba. E demanda di daño pa auto ta wordo rechaza. Hues ta comparti Fiscal su punto di bista cu e victimanan no a argumenta e demandanan di daño.
