Hues no ta di acuerdo cu exigencia di Fiscal di 12 luna condicional
- Corte mandando un señal hopi cla
- No por papia tampoco di defensa propio
ORANJESTAD (AAN): Diahuebs merdia 2’or, Hues a dicta sentencia den e caso penal contra e dos agentenan di Polis, M.V. y R.D., kendenan ta wordo acusa di ta complice di a tira mata e hoben Ayden C.J. Lanoy riba 9 Februari 2025 den Madiki Kavel.
Tratamento di e caso a sosode dianan 20 y 23 Februari 2026, unda Fiscal a haya e agentenan di Polis M.V. y R.D. complice di a tira mata Ayden Lanoy. Fiscal a exigi 12 luna di prizon condicional y 180 ora di trabao pa comunidad.
Sentencia: Hues a bisa cu e sentencia ta di casi 30 pagina pero e lo duna en corto su decision. Hues a bisa cu el a concentra mas riba e imagennan di video y investigacion tecnico di Landsrecherche. Hues a bisa cu despues di a blokia e auto na Madiki, ambos Polis a baha for di e patruya di Polis y saca arma. Na mesun momento M.V. a los 3 tiro riba e auto. Un bala so a impacta e auto.
Hues a mustra cu R.D. a los 17 tiro riba e auto. Un di e balanan a impacta, bora e auto y herida Lanoy mortalmente. Hues ta haya cu aki ta trata di complice di mata Lanoy.
A tira innecesario: Hues a mustra cu abogadonan di M.V. y R.D. ta haya cu e Polisnan tabata autoriza pa usa nan arma pasobra nan tabata sinti nan bida na peliger. Hues a bisa cu teniendo cuenta cu leynan di Aruba y Europeo, Polis tin libertad pa uza arma pero te na un limite.
Na opinion di Hues, promer y despues di e incidente no tabatin indicacion cu Lanoy tabata arma. Tabata trata di un chauffeur cu tabata huy di Polis. No tabata tin un situacion cu e dos Polisnan nan bida tabata na peliger. Nan a baha for di e patruya di Polis, saca arma y los tiro. Na opinion di Hues, no tabatin necesidad pa a tira y e Polisnan no tabata autoriza segun ley pa tira.
No por papia di defensa propio: Hues a bolbe mustra cu no tabatin un situacion cu e Polisnan M.V. y R.D. nan bida tabata na peliger. Hues a rechaza e ponencia di abogadonan, cu M.V. y R.D. a actua den defensa propio.
Hues tambe a papia riba e defensa di abogadonan cu e Polisnan lo a pensa cu nan bida ta na peliger. Hues ta haya cu esaki tampoco ta acceptable.
Na opinion di Hues, como agentenan di Polis, tabata spera cu nan lo a actua corecto. E hecho cu nan tabatin diferente asistencia riba e dia ey no ta kita afor cu como Polis, M.V. y R.D. mester por a actua corecto.
Mester paga casi 40 mil Florin di daño: Hues ta haya cu e mayornan y e pareha di Ayden a haci demanda di daño material y inmaterial y Hues a aproba casi 40 mil Florin y tur Polis ta responsabel pa esaki.
Pa cu e castigo, Hues a bisa cu e caso aki ta un tragedia. Te ainda e famia ta afecta. Ta di compronde cu e famia no ta acepta loke a sosode. Hues ta di opinion cu mester duna un castigo husto. Kico ta un castigo husto? Mester duna castigo pa loke no a haci bon. Mester tene cuenta cu nan ta hende y kico ta consecuencia di castigo pa e Polisnan y kico esaki ta pa comunidad.
A tira 20 biaha y Ayden no tabatin chens: Hues a enfatisa cu ta importante cu e Polisnan innecesariamente a haci uso di arma. El a mustra cu en total M.V. y R.D. a tira 20 biaha riba e auto y Lanoy no tabatin chens. Hues a bisa cu M.V. y R.D. a kita e bida di un hoben.
No acepta exigencia di Fiscal: Hues a bisa cu e no ta di acuerdo cu exigencia di Fiscal. Hues ta haya cu mester duna castigo di prizon. Hues ta haya cu mester spera cu Polis ta acuta y corecto cu un arma. Comunidad mester por confia cu no sin mas, Polis ta bay haci uso di arma.
Hues a bisa cu mester manda señal bon cla cu Corte no ta tolera uso no necesario di arma di candela.
Condena di 3 aña di prizon: Pa cu e castigo, Hues a bisa cu e ta tene cuenta cu ambos Polis ta promer biaha cu nan ta dilanti Hues pa un lamentable caso asina. Hues a bisa cu e no ta duda cu M.V. y R.D. a spera cu algo asina por a pasa. Hues a bisa cu e ta tene cuenta tambe cu M.V. y R.D. no por traha como Polis y cu pa resto di nan bida nan mester carga loke nan a haci.
Hues ta haya M.V. y R.D. complice di a mata Lanoy y a condena nan na 3 aña di prizon di cual 1 aña ta condicional cu un tempo di prueba di 1 aña.
