Corte di Husticia
ORANJESTAD (AAN): E rumannan homber J.L. di 25 aña y D.L. di 20 aña a presenta den sala di Corte pa scucha sentencia di Hues den e caso penal cu Ministerio Publico a cuminsa contra nan. E rumannan a scucha Hues bisa cu nan ta complice di intento di mata y complice di posecion di arma di candela. Hues a confirma a exigencia di Fiscal y a condena e rumannan L. na 6 aña di prizon.
Fiscal a baha pisa: Luna pasa, tratamento di e caso a tuma lugar caminda e dos rumannan L. ta nenga di a tira riba e homber Z. Celaire. Fiscal ta haya legalmente proba cu e rumannan L. ta complice di intento di mata y complice di posesion di arma.
Fiscal a bisa cu e rumannan L. a tira riba caminda publico riba e auto den cual Celaire tabata sinta. Fiscal ta considera esaki un caso hopi serio. El a bisa cu si e bala a perfora e asiento completo, Celaire lo no ta hunto cu nos mas.
Fiscal a mustra cu J.L. na September 2020 a wordo condena na 5 aña di prizon pa intento di mata cu arma di candela. D.L. na Mei 2024 a wordo condena pa posesion di arma. Fiscal a bisa cu e dos rumannan L. a haci e tiramento den nan tempo di prueba. Fiscal ta considera nan recidivista y a exigi 6 aña di prizon pa cada un. Fiscal a bisa tambe cu e pochi y saco di marihuana cu a haya, mester wordo destrui.
Sentencia: Ta asina cu Z. Celaire no a presenta pa scucha e sentencia. Parce cu e no tabata kier a bay Corte. Luna pasa si e tabata presente pero sinta den un oficina separa y bou vigilancia estricto.Ta asina cu actualmente Z.Celaire ta encarcela relaciona cu un caso di menaza cu arma.
Hues a sera tratamento di e caso y a dicta sentencia di biaha. Hues ta haya legalmente proba cu e rumannan L. riba 18 December 2025 a tira riba Z. Celaire. Hues ta haya cu ambos tabata den posecion di arma di candela. Hues ta haya e declaracion di Celaire confiabel.
Hues a bisa cu investigacion a mustra cu e rumannan L. a tira riba Celaire su auto y e auto a haya impacto di bala. Hues a sigui bisa cu riba imagen di camera, Polis a mira e number di e auto Nissan Versa cu a tira riba e auto cual Celaire tabata core.
Hues a bisa cu a huur e Nissan Versa y J.L. tabatin esaki. Hues ta haya cu J.L. tabata stuur e auto y D.L. a tira riba e auto di Celaire.
Hues ta considera esaki un intento di mata y no por papia di intento di asesinato pasobra no tabatin plan haci promer cu a haci e tiramento. Na opinion di Hues, e forma con e rumannan L. tabata anda cu otro, e ta considera esaki complice di intento di mata.
Castigo di 6 aña di prizon: Pa cu e castigo, Hues a bisa cu e ta tene cuenta cu aki ta trata di intento di mata. Esaki ta un caso hopi serio. Hues a mustra cu riba un distancia cortico a tira riba e auto. E bala a pasa door di auto y keda pega den e stoel unda Celaire tabata sinta. Hues ta haya cu e rumannan L. a pone bida di otro hendenan den vecindario na peliger. E hendenan cu ta biba eynan lo a sinti nan mes insigur.
Hues a sigui bisa cu e ta tene cuenta tambe cu anterior ya D.L. y J.L. a wordo condena pa algo similar. Hues a confirma e exigencia di Fiscal y a condena D.L. y J.L. na 6 aña di prizon. E droga mester wordo destrui.
