Corte Supremo na Hulanda a confirma castigonan di Hof
- Casacion a duna e ultimo palabra
ORANJESTAD (AAN): E dia tan spera a yega! Diamars 14 di April 2026, wowo di hopi observado politico tabata dirigi riba Corte di Casacion na Hulanda.
Esey ta debi cu riba Diamars, e Corte Supremo aki (un constelacion di 6 Hues) na Hulanda, a dicidi cu e apelacion di Benny Sevinger contra su condena di Corte Superior ta keda rechaza.
Corte Supremo a bisa cu e castigo di Corte Superior pa Benny Sevinger ta keda manera el a wordo sentencia! Esey ta nifica cu Benny Sevinger ta keda condena na 4 aña di prizon di cual 1 aña ta condicional. Ademas a prohibi Benny Sevinger pa 6 aña largo no por haya trabao den Gobierno y tampoco por postula su mes como candidato di organonan representativo.
Prizon pa Benny Sevinger: Corte Supremo ta haya Benny Sevinger culpabel di:
(*) Complice di horta Gobierno.
(*) Di a laga su mes wordo cumpra.
(*) Di malversacion.
Prizon pa Leoncita Arends: Corte Supremo ta rechaza e apelacion di Maria Leoncita Arends y ta confirma e castigo di Hof di Corte Superior. Maria Leoncita Arends ta keda condena na 2 aña di prizon di cual 1 aña ta condicional cu un tempo di prueba di 3 aña.
Prizon pa Pieter Susebeek: Corte Supremo ta rechaza e apelacion di Pieter Susebeek y ta confirma e castigo di Hof di Corte Superior. Pieter Susebeek ta keda condena na 30 luna di prizon di cual 10 luna ta condicional cu un tempo di prueba di 2 aña. Tambe a tuma decision cu e 1.3 Miyon Dollar lo keda confisca.
Corte Supremo a determina lo siguiente relaciona cu e modus operandi di e fraude. Compinchinan di e Ministro (hopi liga cu su partido AVP) a presenta via nan compania e peticion na Ministro pa obtene (opcion riba) derecho di algun tereno erfpacht. E companianan aki tabata ‘bashi’ ora di a haci e peticionnan aki, pues nan no tin nada di balor. Meta di e compinchinan tabata pa bende despues e terenonan aki cu ganashi extra halto. E rol di ex-Ministro Sevinger tabata pa djis core aproba e peticionnan, no obstante cu tin retraso enorme den aprobacion di peticionnan na demas ciudadanonan di Aruba. Pero mesora e tabata duna su firma y duna OK pa acuerdo di duna tereno.
Di e forma aki, e tabata duna prioridad na e solicitud di e compinchinan. Asina e tabata evita cu e peticionnan tabata wordo evalua administrativamente segun reglanan vigente.
Ademas, Ministro a acepta regalo di su compinchinan den e periodo durante cual e tin di dicidi riba nan peticionnan pa otorga tereno cu nan a pidi. Esaki ta un delito, pasobra e tabata laga su mes wordo cumpra “pasieve ambtelijke omkoping”. Pa colmo e ex-Ministro a uza placa di un fundacion opera pa su campaña electoral, pa por cubri gasto di viahe priva di su casa, y segun Corte Supremo esaki ta malversacion.
Reaccion na Aruba: E reaccion tabata hopi na Aruba riba Diamars. Ta mira cu husticia definitivamente ta condena un otro Ministro di AVP pa corupcion. Un oponente a bisa, cu aworaki e yiu muhe di e ex-Ministro ta den Parlamento pa asina sigui cu e ‘legado di Sevinger’. Pero ta di ki tipo di legado ta referi aki na dje.
Diamars mainta, a nota cu ningun Parlamentario di AVP no a presenta na trabao. Esaki a wordo interpreta door di hopi hende Partido AVP a bay den panico cu e decision di Casacion aki.
