Abogado a convence Hues cu no por confisca placa djis pa sospecho di laba placa
ORANJESTAD (AAN): E homber Colombiano biba na Aruba, di inicial P.C. di 40 aña, a scucha Fiscal exigi pa e mas cu 18 mil Dollar cu Douane a confisca di dje,
keda confisca y 2 luna di prizon condicional. Abogado mr. Rosenstand a convence Hues cu no por confisca placa sin mas riba sospecho di laba placa.
Hues a declara P.C. liber di e acusacion di labamento di placa. Pero si Hues a haya P.C. culpabel di no a declara na Douane e placa y a impone un multa di 20 mil Florin y cu P.C. mester haya su placa bek.
No a declara na Douane: E acusacion cu Fiscal a presenta contra P.C. ta cu riba 9 November 2024, P.C. no a declara mas cu 18 mil Dollar na Douane y ta acusa P.C. di labamento di placa.
Muhe gara cu placa scondi: Tur cos a start ora cu Douane a constata cu un pasahero femenino lo tabatin mas placa scondi y a haci investigacion. E muhe a bisa cu el a haci e homber P.C. fabor di hiba placa Colombia. Douane a haya mas cu 18 mil Dollar scondi den paña y den un bleki. E muhe a bisa cu 700 Dollar ta di dje y e resto ta di P.C. E placa aki a keda confisca.
Durante tratamento di e caso den Corte, P.C. a bisa Hues cu e no a declara e cantidad di placa na Douane door cu e momento ey e tabata ilegal na Aruba. El a bisa cu promer e tabata kier a manda e placa via companianan di Money Transfer, pues lugar di manda placa pero e cantidad ta mucho mas cu ta permiti. El a bisa cu e muhe ta un familiar cu a haci’e un fabor pa hiba e placa. Hues a puntr’e cuanto el a paga e muhe. El a bisa cu e no a paga e dama pa haci e fabor.
Hues a bisa cu P.C. a declara na Polis cu e placa el a gana trahando riba autonan aki na Aruba. El a splica Polis cu el a bende su auto y otro cosnan na Colombia pa asina bin Aruba. El a bin Aruba cu 5 mil Dollar. Segun P.C. e placa cu e kier a manda Colombia tabata pa paga riba tereno cu e tabata atrasa den pago.
Hues a bisa cu Polis a haci investigacion y algun hende a bisa cu nan a paga P.C. y algun a bisa cu nunca a tende P.C. Investigacion ta mustra cu P.C. lo a gana 1.100 Florin y kitando gastonan lo a resta 600 Florin. P.C. a bisa Hues cu e ta haci negoshi di Crypto na Merca y ta gana 2 mil Dollar pa luna. El a bisa cu actual e ta inscribi na Aruba y ta trahando pa un compania.
Fiscal a cuestiona e hecho cu P.C. no a paga belasting. P.C. a bisa Hues cu awor cu e ta legal e ta haciendo e areglonan pa paga belasting di loke el a traha.
Fiscal exigi castigo y pa no debolbe Dollars: Fiscal a bisa Hues cu P.C. no a declara placa na Douane. E dama a sconde e placa den su paña y den un bleki. Fiscal a mustra cu P.C. a declara na Polis cu e placa ta di dje. E placa tabata mas cu por viaha cune sin declara na Douane. Fiscal ta haya legalmente proba labamento di placa.
El a mustra cu P.C. tabata trahando ilegal y a gana masha hopi placa y no a paga belasting. Esaki ta un hecho castigabel. Fiscal a sigui bisa cu P.C. a cambia e placanan na dollars y a duna e dama pa hiba Colombia. Fiscal a exigi pa e placa keda confisca y 2 luna di prizon condicional cu un tempo di prueba 2 aña pa P.C.
Abogado no ta haya cu por confisca placa: Abogado mr. Rosenstand a remarca cu P.C. no tabata ilegal sino indocumenta. E tabata traha y cobra placa pero e no a viola Belasting. E suma di 18.400 Dollar y mas placa cash a wordo haya riba e muhe. Abogado ta haya cu e hecho cu no a declara cuanto placa ta bay cun’e, no ta un violacion of acto criminal. E abogado a bisa Hues cu P.C. ta admiti cu no a declara e placa ora di viaha.
Na opinion di abogado, e hecho cu no a declara e placa, no por wordo considera un hecho criminal. P.C. a bisa cu e placa tabata pa paga tereno cu a cumpra na Colombia. E abogado no ta haya cu por confisca e placa sin mas. Na opinion di mr. Rosenstand, no por papia aki di labamento di placa pasobra e placa no ta procedente di fuentenan criminal. No por mustra cu e placa ta procedente di fuente criminal.
El a mustra cu P.C. a duna splicacion bon cla di e fuente for di unda el a haya e placa y pa kico e placa tabata destina. E abogado a bisa cu P.C. a splica cu el a bende un auto na Colombia y a bin cu algun mil Dollar Aruba. El a keda cu e placa aki y a traha riba electricidad di autonan na Aruba y a splica su entrada. Tin testigonan a declara cu P.C. a traha riba nan auto y a paga. Na opinion di mr. Rosenstand, no tin indicacion cu P.C. ta liga cu fuente criminal. No tin ningun acusacion di lo ta envolvi den droga. No tin ningun indicacion cu e placa ta di fuente ilegal. Abogado ta haya cu mester declara P.C. liber di labamento di placa y e placa mester wordo debolbe.
Sentencia: Hues a bay evalua un rato y a dicta sentencia di biaha. Hues a bisa cu P.C. ta wordo acusa di no a declara placa cu kier a hiba exterior. Hues ta considera esaki un hecho castigabel. E acusacion di labamento di placa ta considera placa haya for di fuentenan criminal. Hues ta haya cu tabatin sospecho mirando e forma con kier a saca e placa for di Aruba. Hues a bisa cu P.C. a declara con el a yega na e placanan door di traha riba electronica di auto.
Hues ta haya cu Fiscal no por proba cu tabatin labamento di placa. Tambe Hues ta haya cu Fiscal ta bisa cu P.C. no a paga belasting pero ta Fiscal mester demostra esey. Hues a declara P.C. liber di labamento di placa. Pa no a declara placa cu kier a hiba for di Aruba, Hues a impone un boet di 20 mil Florin. Hues a ordena pa P.C. haya su placa bek. Fiscal a propone cu lo por desconta e 20 mil Florin for di e placa cu mester debolbe P.C. Abogado mr. Rosenstand a papia un rato cu P.C. y a bisa Hues cu P.C. ta di acuerdo y no lo apela. Fiscal a bisa Hues cu e ta bay pensa.
