ORANJESTAD (AAN): E hombernan Venezolano biba na Aruba J.I. (54), su yiu homber G.I.(29),
e dama pareha di J.I., G.M. (58) y e homber di Colombia biba na Aruba G.G. (44), ayera mainta a presenta den Corte pa scucha nan sentencia. Por a nota cu e homber G.I., a wordo laga liber riba orden di Hues pero asina mes el a presenta pa scucha su sentencia.
Tratamento di e caso a tuma lugar 21 Juli 2025 caminda Fiscal ta acusa e grupo aki cu riba 25 Juli 2024 hunto a exporta un lote di 27.724 gram di cocaina.
EXIGENCIA DI FISCAL
Fiscal ta haya cu ta e compania di J.I. y G.I. a cumpra e motor for di Hulanda y trece Aruba. Fiscal a mustra cu tabatin combersacionnan largo entre G.G. y J.I. riba e compra di e motor. G.G. tabata duna instruccion con mester traha recibo y tambe pone adress falso. E motor ta riba nomber di J.I. pero e no a paga p’e. Na Aruba J.I. a paga impuesto pa e motor. J.I. y G.M. a traha e papelnan pa e motor bay bek Hulanda. Nan a cumpra hopi refresco y papa pa wordo manda Hulanda. E placa aki lo ta di G.G. Polis a haya e recibonan den cellular di G.G. Na opinion di Fiscal, esaki ta un forma di sconde e droga y a pone adres di un amiga di G.M. caminda nan mester bay.
Fiscal ta haya legalmente proba exportacion di droga. Ta trata di un cargamento grandi di cocaina. Fiscal ta haya cu G.G. a mal uza e compania di J.I. pa exporta cocaina pa Hulanda. Fiscal a exigi 58 luna di prison pa G.G. y 53 luna di prison pa J.I., G.M. y G.I.
SENTENCIA
Ayera mainta Hues a bisa cu ta mas cu 27 Kilo di cocaina tabata scondi den un motor di coriente cu mester a bay Hulanda. Hues a mustra cu e homber G.G. a admiti. Hues ta haya cu tabatin un organizacion hopi grandi y coordina. Hues a sigui bisa cu for di investigacion por mira cu tabatin combersacionnan intensivo cu ta mustra cu tabata usa motor di coriente pa pone droga aden y manda Hulanda. Na opinion di Hues, J.I. a puntra G.G. si tabatin droga den e motor. Esaki ta mustra cu J.I. a tuma riesgo cu e ta participa den transporte di droga. Hues a bisa cu mescos ta conta pa e dama G.M. Hues ta haya cu G.I. a coopera den esaki. Hues a conclui cu tur cuater ta complice di exporta cocaina. El a bisa cu cada ken tin su funcion.
CASTIGO
Pa cu e castigo, Hues a bisa cu cocaina ta malo pa salud di hende y ta crea criminalidad. Hues a mustra cu G.G. tabatin e funcion di coordina y guia. Hues tambe a bisa cu e ta tene cuenta cu 28 Februari 2025, G.G. a wordo condena na 30 luna di prison pa exportacion di un lote di cocaina.
Hues a mustra cu J.I. tabata envolvi den yuda. Hues ta haya cu G.I. su funcion tabata hopi minimo.
Hues a condena G.I. na 16 luna di prison di cual 10 luna ta condicional cu 2 aña di prueba. Esey ta nifica cu G.I. no mester bolbe bay sera. Hues a condena J.I. y su pareha G.M. na 3 aña di prison. Hues a bisa cu e ta condena G.G. tambe na 3 aña di prison. Esey ta nifica cu en total G.G. a haya 5 aña y 6 luna di prison di castigo pa traficacion di droga.
Por a nota cu J.I. no tabata di acuerdo cu e sentencia y tabata critica cu esaki ta inhusto. Hues a remarca cu si J.I. no ta di acuerdo e por apela. J.I. cu man na cabez a keda ripiti varios biaha cu e ta inhusto. Su abogado a hala su atencion cu e mester keda keto.
