Studiante Max Ng a representa Aruba na un competencia unda el a actua como Fiscal ta duna requisitorio

ORANJESTAD (AAN): E studiante Max Ng a representa Aruba den e competencia “OM Nationale Requireerwedstrijd 2026” na Amsterdam, Hulanda.

E ta un competencia prestigioso unda ta reta talentonan huridico riba tereno di derecho penal y dunamento di pleidooi, pues requisitorio.

   Danki na un preparacion intensivo y un guia solido, Max a logra di presenta su mes na forma excelente, incluyendo dilanti un oponente cu hopi aña di experiencia.  E competencia no a djis ofrece un reto intelectual, sino tambe perspectivanan balioso riba e rol complica di un Fiscal.

   “Husticia no ta blanco-preto, e ta rekeri perspectiva, equilibrio, y responsabilidad”.

   Un gradicimento special na Facultad di Derecho, Ministerio Publico di Hulanda, y docente Ruth Bonnevalle pa nan sosten y guia.

   Max ta animando demas studiantenan: “E ta un experiencia cu ta ponebo crece tanto den parti huridico como tambe ta yudabo crece den bo persona.”