Fiscal a baha pisa
ORANJESTAD (AAN) E hombernan Venezolano Y.R. y E.D.S. ta worde acusa cu entre 1 December 2023 y 11 December 2023, a haci traficacion di hende y cu door di e hecho aki tres of mas hende a bin fayece riba laman.
Traficacion di hende: Hues a mustra cu Polis a haya notificacion anonimo cu dia 10 December 2023 lo bin un boto for di Venezuela cu 7 persona y algun di nan lo bin cu intencion di haci asalto na Aruba.
Esey a haci cu Polis tabata alerta. Dia 10 December 2023, Polis a haya notificacion cu 5 di esnan di e boto a yega y ta keda na un cas na Weg Fontein. Polis a bay na e cas y topa cu nan ainda cu paña muha. Polis a haci investigacion riba smartphone di e muher di inicial M. kende ta biba na e cas. Ta asina cu e muher M. a yama 2 persona, na momento cu e 5 personanan a yega na su cas.
Cuatro curpa sin bida: Hues a sigui bisa cu segun e relato di Polis, dia 11 December 2023 Polis a worde notifica cu a haya curpa ta drief na Vader Piet. Polis a bin haya 4 curpa, dos dama y dos homber.
Despues a haya informacion cu dos persona lo ta perde. Investigacion ta mustra cu entre e 5 personanan cu a yega na e cas na Weg Fontein tabata e sospechoso di inicial D.S.
Detene otro sospechoso: Despues Y.R. a bay cay den e caso, despues di a scucha yamadanan y scucha testigonan cu a bin cu e boto. Nan ta bisa cu ta Y.R. ta esun responsabel pa e boto. Y.R. a worde deteni y a worde interoga pa Polis.
Segun Y.R., e unico cos cu e ta envolvi, ta pa ricibi un cuña. Ta asina cu e cuña tabata un di e curpanan cu a haya ta drief na Vader Piet. For di e interogacion por a compronde cu un di e naufragonan G. a haya estadia cerca Y.R. Segun Y.R. ta dos persona e lo bay duna estadia esta su cuña y G.
Sospechoso ta nenga: Hues a mustra cu Polis ta sospecha cu Y.R. ta esun cu a yuda den preparacion di e viahe. Y.R. a bisa Hues cu el a conseha su cuña pa busca un persona cu por yuda nan haya un lancha cu motor cu por viaha di Venezuela bin Aruba. El a desmenti cu el a bisa ki tipo di lancha y motor lo mester busca. Ta asina Y.R. ta un piscador. Y.R. tabata sa cu un homber D., kende ta conoci di dje na Venezuela, tin un boto cla pa nabega. Segun Y.R., el a papia cu D., cu ta un famia di dje, cu tin hende cu ta interesa den cumpra su boto. Y.R. a bisa cu e no sa ki tipo di boto D. tin. El a bisa cu e tabata na Aruba y su cuña a bay regla cu D.
Hues a puntra Y.R. si el a puntra su ruman muher na Venezuela pa busca 6 persona pa hiba na e lugar caminda e boto lo sali pa bin Aruba. Y.R. a desmenti esey. Hues a mustra cu den interogacion di Y.R. ta para asina. Segun Y.R. esey no ta berdad. Hues a bisa cu segun investigacion Y.R. lo mester a busca su cuña y e hombernan G. y J. Segun Y.R. e lo mester ricibi su cuña y e homber G. El a bisa Hues cu nan ta su famia.
Hues a puntra si Y.R. a haya placa pa e transporte di e hendenan. Segun Y.R. e no a ricibi nada. Hues a mustra cu Y.R. a manda 500 Dollar Venezuela pa e cuña por viaha bin Aruba. Y.R. a reacciona cu el a manda placa pa su cuña pero e placa ta pa su yiunan. El a bisa Hues cu loke Polis ta skirbi no ta cuadra cu e berdad. Hues a bisa Y.R., cu el a firma su declaracion na Polis.
Hues ta mustra cu tin un combersacion via chat cu ta 50 hende lo bin. Hues a mustra cu Y.R. a bisa cu e boto a costa 1.800 Dollar, e motor 1.650 Dollar y 200 Dollar di gasolin. Y.R. a desmenti di a bisa esey na Polis. Y.R. a bisa cu e no tin nada di haci cu e transporte y preparacion.
E solamente mester a ricibi 2 persona. El a bisa cu otro 2 famia di esnan cu a fayece ta culpa Y.R. di tur esaki siendo cu e solamente mester a ricibi 2 hende. El a bisa cu e caso aki ta duele pasobra ta su famia.
Sospechoso ta nenga di tabata Capitan: Hues a sigui cu D.S.. El a bisa cu Y.R. a menciona cu un tal Chibo lo ta e capitan. Ta resulta cu D.S. ta Chibo. Tin naufragonan cu a reconoce D.S. como e capitan. D.S. a declara na Polis cu 10 December 2023 el a navega y tabatin 11 persona abordo di e lancha. Segun D.S. tabatin 2 hende mas, un para mey mey den e lancha y e capitan. En total 13 persona.
Segun D.S., un tal Toto ta doño di e lancha y Guito ta omo di Toto. Toto tabata na Aruba, wardando e boto. Hues a mustra cu na Polis D.S. a bisa cu C. a pidie pa yuda prepara. D.S. a desmenti esaki dilanti Hues. El a nenga di a yuda di busca un motor pa e boto. Hues a bisa cu esey ta para den declaracion di D.S. Segun D.S., e no a declara esey.
Hues a bisa cu D.S. a bisa cu e boto a bolter door di un ola grandi. D.S. a bisa Hues cu e lancha tabata chikito pa e cantidad di hende. El a bisa cu ora nan a sali for di Venezuela, e laman tabata trankil. El a bisa cu door di e situacion na Venezuela, el a bin Aruba. El a desmenti di a navega e boto. Hues a mustra cu na Polis, el a bisa cu e promer mey ora di navegacion, el a navega e boto pasobra e capitan kier a huma.
Segun D.S. e no ta responsabel pa nada cu a pasa pasobra e no a haya ningun cen. El a bisa Polis cu el a yuda e capitan den cambia e slang di tanki di gasoline ora cu e tanki di gasoline bira bashi. D.S. a bisa cu el a paga 800 Dollar pa por a viaha bin Aruba. Segun D.S., e prijs tabata 1.000 Dollar pero e dama, kende tambe a fayece den laman, a acepta 800 Dollar. El a sigui bisa cu un tal Guito tabata e capitan di e lancha. Hues a bisa cu segun declaracion di otronan, D.S. tambe tabata capitan. El a desmenti esey.
D.S. a bisa cu ora el a yega Aruba, famia di esnan cu a fayece, a secuestr’e y maltrat’e pa e bisa cu e tabata e capitan di e boto. Segun D.S., Guito ta e capitan y cu Guito a muda pa otro lugar y e no sa nada di dje. El a bisa cu e ta sintie malo cu nan ta culp’e di e disaster siendo cu el a bin Aruba pa traha y no tin nada di haci cu e caso.
Tin 3 mas sospechoso: Hues a puntra Fiscal si tin mas persona envolvi y si lo persigui nan. Fiscal a bisa cu tin 3 persona cu a worde interoga y ainda no tin un decision si lo bay persigui nan of no.
Hues a mustra cu Y.R. tin casi 7 luna sera den KIA. El a bin ilegal Aruba y ta bibando cu su señora y 1 yiu. Tin 2 otro yiu na Venezuela. Y.R. a bin Aruba pa traha pa genera placa pa su famia. D.S. tin 3 luna sera den KIA. E ta biba na Venezuela cu su famia y pesey el a bin Aruba pa busca trabao pa traha y mantene su famia.
Fiscal a exigi 7 aña di prison: Fiscal a bisa cu a haya 4 curpa na costa di Aruba. Un di e curpanan no por a identifica pasobra pisca a come partinan di e curpa. A haya 5 hende na un cas na Weg Fontein. Nan a declara cu e boto a bolter y nan a logra yega tera. Fiscal a bisa cu e no ta kere Y.R. cu e no tin nada di haci cu e caso.
Segun Fiscal, tin combersacion via chat cu ta mustra cu Y.R. tabata duna instruccion ki tipo di boto lo mester uza y motor. Tambe cu el a manda placa pa yuda e cuña cumpra e boto. Segun Fiscal, tur esaki Y.R. a declara na Polis. El a mustra cu segun Y.R., ta D.S. tabata e capitan. Fiscal a mustra cu a navega cu e boto pa Aruba siendo cu servicio meteorologico a avisa cu laman ta bruto y pa botonan chikito no por navega. Fiscal a bisa cu traficacion di hende ta un asunto serio.
Den e caso aki, e boto a bolter y 4 hende a muri. Entre e hendenan den e boto, tabatin un mucha cu a logra yega tera. Fiscal a mustra riba sentencia di Hof cu a confirma 5 aña di prison pa traficacion di hende caminda 1 persona a fayece. Pa cu e castigo, Fiscal a bisa cu e ta tene cuenta cu D.S. tabata riba e boto y Y.R. a perde un familiar. Fiscal ta haya cu Y.R. tabatin un funcion importante den e organizacion y D.S. tabata e capitan. El a exigi 7 aña di prison pa tur dos.
Abogado: Abogado mr. Edwards di Y.R. a bisa Hues cu ta acusa su cliente di a trafica hende pa haya ganashi. Esey no ta cuadra cu e realidad. E abogado a bisa cu Y.R. no a haci nada pa haya ganashi sino a yuda pa tuma su cuña ora e bin Aruba. E hecho cu el a manda 500 Dollar pa su cuña ta pa Y.R. su yiunan y no pa yuda paga e navegacion, manera ta pretende. E abogado a enfatisa cu Y.R. no a mobilisa hendenan pa haci e navegacion.
Na opinion di e abogado, ta famianan di e otronan a haci trabaonan pa por logra haci e nabegacion. E abogado a mustra cu tin combersacion chat entre Toto y un tal L. caminda por mira cu tabatin preparacionnan amplio pa e viahe. 1 December 2023 nan tabata papia con lo mester haci e navegacion y cu tin helicopter ta bula. Tambe cu ta na altura di e molinanan grandi na Aruba, lo mester drenta.
Na opinion di abogado mr. Edwards, den tur esakinan no ta menciona nada di Y.R. El a bisa cu e cuña di Y.R. a fayece y esaki a afecta Y.R. hopi. E abogado ta haya cu no punta dede riba Y.R. di ta responsabel pa e disaster aki. E ta haya cu mester declara Y.R. liber di e acusacion. E ta haya e castigo exigi pa Fiscal ta hopi exagera.
Abogado mr. Zara a bisa Hues cu su cliente D.S. mester worde declara liber pa e disaster cu a sosode cu e traficacion di hende. E abogado a bisa Hues cu mester mira D.S. como un pasahero den e lancha y no como e capitan.. El a paga 800 Dollar pa viaha y a keda debe 200 Dollar. Na opinion di abogado, D.S. no ta envolvi den e planeamento di e navegacion y ningun momento D.S. a ricibi placa.
- Zara a sigui bisa cu D.S. a nenga cu e ta capitan. El a worde secuestra na Aruba y maltrata pa famia di algun di esnan cu a fayece, pa e tuma culpa di capitan. E abogado a bisa cu D.S. a bin Aruba pa traha y no a yuda cu e preparacion di e viahe y mucho menos tabata capitan. D.S. ta un piscador y a mira cu e laman ta calmo y pesey a dicidi di bin Aruba. E abogado ta haya cu D.S. no ta directamente envolvi den planea den e viahe. Na opinion di mr. Zara, no por condena D.S. E ta haya cu Fiscal ta exigi castigo exagera.
Hues a bisa cu 10 Januari 2025 e lo sera tratamento di e caso y di biaha lo dicta e dia ey sentencia pa 8.15 di mainta.
